មន្ត្រីជាន់ខ្ពស់ម្នាក់របស់ក្រុមហាម៉ាស បានប្រាប់សារព័ត៌មាន BBC ថា ក្រុមប្រដាប់អាវុធប៉ាឡេស្ទីនមួយនេះ នឹងបដិសេធសំណើចុងក្រោយរបស់សហរដ្ឋអាមេរិក សម្រាប់បទឈប់បាញ់ថ្មីនៅតំបន់ហ្កាហ្សា និងកិច្ចព្រមព្រៀងដោះលែងចំណាប់ថ្នូរ ដែលគាំទ្រដោយអ៊ីស្រាអែល។

សេតវិមានបាននិយាយកាលពីថ្ងៃព្រហស្បតិ៍ (២៩ ឧសភា) ថា អ៊ីស្រាអែលបាន "យល់ព្រម" លើផែនការរបស់ប្រសិតអាមេរិក លោក Steve Witkoff ហើយថាខ្លួនកំពុងរង់ចាំការឆ្លើយតបជាផ្លូវការពីក្រុមហាម៉ាស។ រដ្ឋាភិបាលអ៊ីស្រាអែល មិនបានធ្វើអត្ថាធិប្បាយទេ ប៉ុន្តែលោកនាយករដ្ឋមន្ត្រី Benjamin Netanyahu តាមសេចក្តីរាយការណ៍ បានប្រាប់ក្រុមគ្រួសារចំណាប់ថ្នូរកាលថ្ងៃព្រហស្បតិ៍ថា លោកបានទទួលយកផែនការរបស់លោក Witkoff ហើយ។

ប្រព័ន្ធផ្សព្វផ្សាយអ៊ីស្រាអែល បានដកស្រង់សម្តីមន្ត្រីអ៊ីស្រាអែល ដោយនិយាយថា សំណើនោះនឹងមើលឃើញក្រុមហាម៉ាស ប្រគល់ចំណាប់ថ្នូរនៅរស់ចំនួន ១០នាក់ និងសាកសពចំណាប់ថ្នូរ ១៨នាក់ ជាពីរដំណាក់កាល ដោះដូរនឹងបទឈប់បាញ់ ៦០ថ្ងៃ និងការដោះលែងអ្នកទោសប៉ាឡេស្ទីន នៅក្នុងពន្ធនាគារអ៊ីស្រាអែល។

មន្ត្រីក្រុមហាម៉ាសរូបនោះបាននិយាយថា សំណើនេះមិនបំពេញតាមការទាមទារគោលសំខាន់ៗរបស់ក្រុមខ្លួនទេ រួមទាំងការបញ្ចប់សង្រ្គាមជាអចិន្រ្តៃយ៍ ហើយខ្លួននឹងឆ្លើយតបវិញក្នុងពេលសមស្របមួយ។ មន្រ្តីហាម៉ាសបន្តថា កិច្ចព្រមព្រៀងនេះផ្ទុយនឹងការពិភាក្សាពីមុន រវាងអ្នកចរចារបស់ក្រុមសកម្មប្រយុទ្ធនេះ និងលោក Witkoff៕