បេក្ខភាពប្រធានាធិបតីមកពីក្រុមសេរីនិយមរបស់កូរ៉េខាងត្បូង លោក Lee Jae-myung ត្រូវបានព្យាករថានឹងឈ្នះការបោះឆ្នោតជ្រើសរើសប្រធានាធិបតីថ្មីនៅសប្តាហ៍ក្រោយនោះ នៅក្នុងលទ្ធផលមួយដែលអាចតម្រង់ទិសសម្ព័ន្ធមិត្តដ៏សំខាន់របស់សហរដ្ឋអាមេរិកឡើងវិញ លើគោលនយោបាយនានា រាប់ចាប់ពីប្រទេសចិន រហូតដល់បញ្ហាអាវុធនុយក្លេអ៊ែរ និងកូរ៉េខាងជើង។

អតីតប្រធានាធិបតីអភិរក្សនិយម លោក Yoon Suk Yeol ដែលត្រូវដកចេញពីតំណែងជុំវិញក្រឹត្យច្បាប់អាជ្ញាសឹករយៈពេលខ្លីកាលពីខែធ្នូ បានបង្កើនការគាំទ្រទាំងស្រុងលើទីក្រុងវ៉ាស៊ីនតោន ប្រកាន់ជំហរតឹងរ៉ឹងលើកូរ៉េខាងជើង និងជួសជុលទំនាក់ទំនងជាមួយជប៉ុន។

ផ្ទុយមកវិញ លោក Lee ដែលបានចាញ់លោក Yoon យ៉ាងស្ដួចស្ដើងក្នុងការបោះឆ្នោតឆ្នាំ២០២២ បានទទួលយកទស្សនៈដ៏មន្ទិលសង្ស័យបន្ថែមទៀតពីសម្ព័ន្ធមិត្តជាមួយសហរដ្ឋអាមេរិក ហើយប្តេជ្ញាថានឹងបន្តទាក់ទងជាមួយកូរ៉េខាងជើង មិនប្រឆាំងចិន និងរុស្ស៊ី ខណៈក៏បានរិះគន់យ៉ាងជូរចត់ចំពោះទំនាក់ទំនងរបស់លោក Yoon ជាមួយជប៉ុន។

មន្រ្តីនៅទីក្រុងវ៉ាស៊ីនតោន ងឿងឆ្ងល់ថា តើការជំរុញរបស់លោក Lee លើបញ្ហាជាច្រើននោះនឹងស្ថិតស្ថេរយូរប៉ុណ្ណា ហើយថា តើទស្សនៈរបស់លោកអាចប៉ះទង្គិចយ៉ាងដូចម្តេចខ្លះជាមួយលោកប្រធានាធិបតីអាមេរិក Donald Trump ដែលបានដាក់ពន្ធលើកូរ៉េខាងត្បូង និងសង្កត់ឱ្យទីក្រុងសេអ៊ូល ចំណាយប្រាក់បន្ថែមទៀតសម្រាប់ទាហានអាមេរិក ២៨.៥០០នាក់ ដែលឈរជើងនៅទីនោះ និងបង្កើនការប្រកួតប្រជែងជាមួយចិន៕