រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយកាលពីថ្ងៃព្រហស្បតិ៍ (២៩ ឧសភា) ថា កិច្ចចរចាពាណិជ្ជកម្មរបស់សហរដ្ឋអាមេរិក ជាមួយប្រទេសចិន "កំពុងជាប់គាំងបន្តិច" ហើយការទទួលបានកិច្ចព្រមព្រៀងលើបន្ទាត់បញ្ចប់ ទំនងជាត្រូវការការចូលរួមដោយផ្ទាល់ពីលោកប្រធានាធិបតី Donald Trump និងប្រធានាធិបតីចិន លោក Xi Jinping។

រយៈពេលពីរសប្តាហ៍បន្ទាប់ពីការចរចារទម្លាយភាពជាប់គាំងដឹកនាំដោយលោក Bessent ដែលបណ្តាលឱ្យមានកិច្ចព្រមព្រៀងបញ្ចុះពន្ធបណ្តោះអាសន្នក្នុងសង្គ្រាមពាណិជ្ជកម្មរវាងប្រទេសសេដ្ឋកិច្ចធំជាងគេទាំងពីរនេះ លោក Bessent បានប្រាប់ទូរទស្សន៍ Fox News ថា វឌ្ឍនភាពចរចាចាប់តាំងពីពេលនោះមក មានភាពយឺតយ៉ាវបន្តិច ប៉ុន្តែបាននិយាយថា លោករំពឹងថានឹងមានកិច្ចពិភាក្សាបន្ថែមទៀតនៅក្នុងប៉ុន្មានសប្តាហ៍ខាងមុខ។

ប្រមុខរតនាគាររូបនេះបាននិយាយថា "នៅចំណុចណាមួយនឹងត្រូវការជំនួបតាមទូរសព្ទរវាងលោក Trump និងលោក Xi"។ លោក Bessent បន្តថា "ដោយមើលឃើញទំហំនៃការចរចាដ៏ស្មុគស្មាញ ជំហានបែបនេះនឹងតម្រូវឱ្យមេដឹកនាំទាំងពីរថ្លឹងថ្លែង និងធ្វើការជំរុញចំពោះគ្នាទៅវិញទៅមក"។

កិច្ចព្រមព្រៀងអាមេរិក-ចិន ក្នុងការបន្ទាបពន្ធបីខ្ទង់សម្រាប់ពេល ៩០ថ្ងៃ បានជំរុញឱ្យមានការធូរចិត្តដ៏ធំនៅក្នុងភាគហ៊ុនសកល។ ប៉ុន្តែការបន្ធូរបន្ថយនេះមិនទាន់បានដោះស្រាយហេតុផលមូលដ្ឋានសម្រាប់ការដំឡើងពន្ធរបស់លោក Trump លើទំនិញចិននោះទេ ដែលភាគច្រើនជាការត្អូញត្អែររបស់អាមេរិកជាយូរមកហើយ ពីគំរូសេដ្ឋកិច្ចដែលដឹកនាំដោយរដ្ឋ និងជំរុញការនាំចេញរបស់ចិន ដោយទុកបញ្ហាទាំងនោះជាប្រធានបទពិភាក្សានាពេលអនាគត៕