ចិនគ្រោងនឹងដាក់ពង្រាយយានផ្ទុកយានដ្រូនធំជាងគេក្នុងពិភពលោកនៅចុងខែមិថុនាដែលមានឈ្មោះថាយានដ្រូនមាតុភាព(Drone Mothership)ដែលយាននេះសន្យាថានឹងផ្តល់ឱ្យកងទ័ពរំដោះប្រជាជនចិន (PLA) នូវសមត្ថភាពបន្ថែមទៀតក្នុងការដាក់ពង្រាយយានដ្រូនសម្រាប់ការប្រយុទ្ធ ការឃ្លាំមើល បេសកកម្មសង្គ្រោះបន្ទាន់ និងគោលបំណងផ្សេងទៀត។

យោងតាមរបាយការណ៍ដែលបានចេញផ្សាយនៅក្នុងសារព័ត៌មាន South China Morning Post របស់ចិន យានផ្ទុកយានដ្រូនមានឈ្មោះ ជាវ ធៀន (Jiu Tian) មានទម្ងន់១០តោន ជាប្រភេទយានអាកាសគ្មានមនុស្សបើក អាចផ្ទុកយានអាកាសគ្មានអ្នកបើកបរតូចៗ(UAV)រហូតដល់ ១០០គ្រឿងដែលមានទម្ងន់បន្ថែម ៦,៦ តោន ហោះហើរក្នុងចម្ងាយរហូតដល់ ៧.០០០ គីឡូម៉ែត្រ។

យានអាកាសនេះត្រូវបានដាក់បង្ហាញក្នុងខែវិច្ឆិកានៅឯពិព័រណ៍អន្តរជាតិ Zhuhai Air Show ដែលជាពិព័រណ៍ពាណិជ្ជកម្មអវកាសដ៏ធំបំផុតរបស់ប្រទេសចិន ហើយមានសារៈសំខាន់ក្នុងការបាញ់បង្ហោះយានដ្រូនគ្មានអ្នកបើកបរមានឈ្មោះថា kamikaze ឬ ហៅម្យ៉ាងទៀតថា យានដ្រូនអត្តឃាត ។ចំពោះយានអាកាសគ្មានអ្នកបើកបរ(UAVs) ត្រូវបានផលិតឡើងដើម្បីរង់ចាំរហូតដល់គោលដៅរបស់វាត្រូវបានរកឃើញ បន្ទាប់មកស្ទាក់ចាប់ រួចបាញ់កម្ទេចចោល ខណៈត្រូវបានប្រដាប់ដោយគ្រឿងផ្ទុះ។

ដោយមិនដូចយានដ្រូនអត្តឃាត kamikaze ដែលកំពុងប្រើប្រាស់រួចហើយ យានដ្រូនមាតុភាពរបស់ចិន ត្រូវបានបង្កើតឡើងដើម្បីបើកដំណើរការយានដ្រូនសម្របសម្រួលទាំងស្រុង ដែលប្រហែលជាអាចគ្របដណ្ដប់លើប្រព័ន្ធការពារដែនអាកាសដែលមានស្រាប់មួយចំនួន នេះបើយោងតាមសារព័ត៌មាន South China Morning Post ដដែល៕ ។