រដ្ឋាភិបាលប្រទេសជប៉ុន បានសម្រេចដកទណ្ឌកម្មដោយផ្នែកដែលខ្លួនបានដាក់ទៅលើប្រទេសស៊ីរី។ នៅក្នុងប្រទេសស៊ីរី រដ្ឋាភិបាលបណ្តោះអាសន្នកំពុងធ្វើការដើម្បីកសាងប្រទេសឡើងវិញ បន្ទាប់ពីការដួលរលំរបបរបស់លោក Bashar al-Assad កាលពីខែធ្នូ ឆ្នាំកន្លងទៅនេះ។

គណៈរដ្ឋមន្ត្រីជប៉ុន បានព្រមព្រៀងលើចំណាត់ការនេះនៅក្នុងកិច្ចប្រជុំរបស់ខ្លួននៅថ្ងៃសុក្រនេះ។ ធនាគារចំនួនបួន នឹងត្រូវបានដកចេញពីបញ្ជីគោលដៅដែលទ្រព្យសម្បត្តិត្រូវបានបង្កក។ រដ្ឋាភិបាលបណ្តោះអាសន្នស៊ីរី បានស្នើដដែលៗឱ្យបណ្តាប្រទេសនានាដកទណ្ឌកម្មដើម្បីជួយកសាងប្រទេសដែលហែកហួរដោយសង្រ្គាមមួយនេះឡើងវិញ។ សហភាពអឺរ៉ុប បានសម្រេចរួចហើយក្នុងការបន្ធូរបន្ថយទណ្ឌកម្មរបស់ខ្លួនជាដំណាក់កាល។ រដ្ឋាភិបាលសហរដ្ឋអាមេរិក ក្រោមការដឹកនាំរបស់លោកប្រធានាធិបតី Donald Trump ក៏បានប្រកាសបន្ធូរបន្ថយទណ្ឌកម្មផងដែរ។

រដ្ឋមន្ត្រីគណៈរដ្ឋមន្ត្រីលោក Hayashi Yoshimasa បានប្រាប់អ្នកសារព័ត៌មានថា ការសម្រេចនេះបានធ្វើឡើងបន្ទាប់ពីរដ្ឋាភិបាល បានសិក្សាលើបញ្ហានេះគ្រប់ជ្រុងជ្រោយ។ លោក បាននិយាយថា វាផ្អែកលើទស្សនៈដែលថា ប្រទេសជប៉ុននឹងគាំទ្រកិច្ចខិតខំប្រឹងប្រែងជាវិជ្ជមាននៅក្នុងប្រទេសស៊ីរី និងជួយធ្វើឲ្យប្រសើរឡើងជីវភាពរស់នៅរបស់ប្រជាជនប្រទេសនេះដែលបានធ្លាក់ចុះដុនដាបដោយតែវិបត្តិជាច្រើនឆ្នាំ ខណៈនៅតែមានចំណែករួមជាមួយសហគមន៍អន្តរជាតិ។

លោកបាននិយាយថា ប្រទេសជប៉ុននឹងបន្តការសម្របសម្រួលជាមួយក្រុមប្រទេសG7 និងប្រទេសផ្សេងទៀតក្នុងសហគមន៍អន្តរជាតិ ដើម្បីបន្តវិធានដោយប្រសិទ្ធភាពសម្រាប់ការទទួលបានសន្តិភាព និងស្ថិរភាពនៅក្នុងប្រទេសស៊ីរី។