យោងតាមរបាយការណ៍ថ្មីមួយបានឱ្យដឹងថា អង្គការណាតូ គ្រោងនឹងបង្កើនគោលដៅរបស់ខ្លួនសម្រាប់ចំនួនកងទ័ព ដែលរដ្ឋជាសមាជិកនឹងត្រូវផ្តល់ឱ្យសម្រាប់សម្ព័ន្ធយោធានេះរហូតដល់ ៥០% នៅមុនការសម្រេចចិត្តដ៏លំបាកពីអ្វីដែលសមាជិកត្រូវធ្វើ ដើម្បីទប់ទល់ជម្លោះដែលអាចកើតមានជាមួយរុស្ស៊ី។

មន្ត្រីមិនបញ្ចេញឈ្មោះម្នាក់បានប្រាប់សារព័ត៌មានរ៉យទ័រថា គោលដៅបច្ចុប្បន្នរបស់សម្ព័ន្ធយោធាទាំង៣២ នេះគឺថាកងពលតូចប្រហែល ៨០អង្គភាពរបស់ខ្លួន នឹងត្រូវបង្កើនដល់ចន្លោះពី ១២០ ទៅ ១៣០អង្គភាព ពោលគឺអត្រាជិតទ្វេដង។ រ៉យទ័របានរាយការណ៍ដោយដកស្រង់ប្រភពបីថា ប្លុកយោធានេះនឹងស្នើអាល្លឺម៉ង់ នៅសប្តាហ៍ក្រោយ ឱ្យរួមចំណែកកងពលតូចចំនួន៧ បន្ថែមទៀត - បរិមាណទាហានប្រហែល ៤០.០០០នាក់ - ដើម្បីពង្រឹងសមត្ថភាពការពាររួមរបស់សម្ព័ន្ធ។

ក្រុមមន្ត្រីអង្គការណាតូ បានប្រកាសអាសន្នកាន់តែខ្លាំងឡើងជុំវិញការគំរាមកំហែងដែលរុស្ស៊ីអាចនឹងបង្កឡើងចំពោះណាតូក្នុងប៉ុន្មានឆ្នាំខាងមុខ ជាពិសេសបន្ទាប់ពីការចុះហត្ថលេខាលើកិច្ចព្រមព្រៀងបទឈប់បាញ់ដែលអាចកើតមាននៅអ៊ុយក្រែន ដែលនឹងរំដោះទាហានរុស្ស៊ីរាប់សែននាក់ដែលជាប់គាំងនៅតាមជួរមុខ។

ការវាយតម្លៃមានភាពខុសប្លែកគ្នា ប៉ុន្តែការវិនិច្ឆ័យមួយពីចារកម្មសម្ងាត់ការពារជាតិរបស់ប្រទេសដាណឺម៉ាក កាលពីខែកុម្ភៈបាននិយាយថា ខ្លួនជឿថា រុស្ស៊ីនឹងអាចធ្វើសង្គ្រាមទ្រង់ទ្រាយធំប្រឆាំងនឹងអង្គការណាតូ ក្នុងពេលប្រាំឆ្នាំខាងមុខ ប្រសិនបើសហរដ្ឋអាមេរិក បដិសេធមិនចូលរួម។ អ្នកសង្កេតការណ៍ខ្លះទទូចថា ទីក្រុងមូស្គូ អាចត្រៀមបើកការវាយប្រហារមានកម្រិតទៅលើទឹកដីរបស់ណាតូ ក្នុងពេលត្រឹម ៦ខែ បន្ទាប់ពីការបញ្ចប់នៃសង្គ្រាមនៅអ៊ុយក្រែន៕