អ្នកឧកញ៉ា ឆារស៍ វ៉ាន់ នាយកគ្រប់គ្រង ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បញ្ជាក់​ជា​ថ្មីថា នៅក្នុងវឌ្ឍនភាពនៅព្រលានអន្តរជាតិតេជោ គិតមកដល់បច្ចុប្បន្ននេះ បាន​បញ្ចប់​ការ​​សាង​សង់​ប្រមាណជាង ៩៦% ដែលគ្រោងនឹងបើកឱ្យដំណើរការនៅថ្ងៃទី៩ ខែកញ្ញា។ ដោយ​ឡែក​នៅថ្ងៃទី២០ ខែតុលា ឆ្នាំ២០២៥នេះ នឹងសម្ពោធដាក់ឱ្យប្រើប្រាស់ជាផ្លូវការ ក្រោម​អធិបតី​ភាព​ដ៏​ខ្ពង់​ខ្ពស់របស់ សម្តេចនាយករដ្ឋមន្ត្រី ហ៊ុន ម៉ាណែត ។

នៅក្រោយចប់កម្មវិធីដឹកនំាគណៈប្រតិភូកាណាដា ដឹកនាំដោយលោក Louis- Thomas Laurin ប្រធាន​សភាពាណិជ្ជកម្មកាណាដា អញ្ជើញទស្សនកិច្ច ដើម្បីពិនិត្យវឌ្ឍន​ភាព​នៃ​ដំណើរ​ការ​សាង​សង់​ព្រលាន​យន្តហោះអន្តរជាតិតេជោ ក្រុងតាខ្មៅ កាលពីព្រឹកថ្ងៃទី៣០ ខែឧសភានេះ អ្នក​ឧកញ៉ា ឆារស៍ វ៉ាន់ នាយកគ្រប់គ្រងក្រុមហ៊ុន CAIC បាន​មាន​ប្រសាសន៍​បញ្ជាក់​ប្រាប់​ក្រុម​អ្នក​សារ​ព័ត៌មានឱ្យដឹងថា យោងតាមផែនការ គឺបានរៀបចំរួចរាល់អស់ហើយ ហើយក្រុមការងារ​ដែល​គ្រប់​គ្រង​ក្នុងការបម្រើសេវា គឺបានប្រជុំប្រចាំសប្តាហ៍ ដើម្បីត្រៀមផ្ទេរ​ពី​ព្រលា​ន​យន្ត​ហោះ​អន្តរ​ជាតិ​ភ្នំពេញ មកកាន់ព្រលានយន្តហោះអន្តរជាតិតេជោថ្មីនេះ។

អ្នកឧកញ៉ា បានលើកឡើងបន្តថា នៅពេលនេះ អត់សូវផ្តោតលើការសាងសង់ទេ ព្រោះការ​សាង​សង់​គឺ​ចប់​ហើយ។ ចាប់ពី ពេលនេះទៅ គឺមានតែការត្រៀមសំអាត ខណៈនៅ​សល់​តិច​តួច​ប៉ុណ្ណោះ ​ដោយត្រូវរងចាំពីបណ្តាក្រុមហ៊ុនអាកាសចរណ៍ (Air line) ទាំងអស់ នឹងត្រូវផ្លា​ស់​មក​ព្រលាន​ថ្មី ​ដើម្បីភ្ជាប់ប្រព័ន្ធ។ បច្ចុប្បន្នអាចនិយាយបានថា គឺសម្រេចបានប្រហែលជា ៨០% ហើ​យ​កំពុងធ្វើតេស្តបណ្តើរៗ។

អ្នកឧកញ៉ា បានបញ្ជាក់បន្ថែមថា នៅពេលដែលព្រលានថ្មីនេះដាក់ឱ្យដំណើរការ នឹងផ្តល់​ជូន​នូវ​សេដ្ឋកិច្ច​យ៉ាង​ធំធេង ដូចជា នឹងផ្តល់ទៅឱ្យភ្ញៀវ រួមទាំងទេសចរណ៍ អ្នកវិនិយោគ បន្ទាប់មកទៀត​នឹង​បម្រើ​ក្នុង​ជួររាជរដ្ឋាភិបាល។ បន្ថែមពីនេះ គឺវិស័យដឹកជញ្ជូន ខណៈពេលនេះ មានក្រុមហ៊ុន​ផ្នែក​ដឹក​ជញ្ជូនជាច្រើន បានលើកសំណើរដើម្បីសាងសង់ឃ្លាំងបន្ថែមទៀត ដើម្បីផ្ទុកទំនិញ។

សូមបញ្ជាក់ថា ព្រលានយន្តហោះអន្តរជាតិតេជោ ក្រុងតាខ្មៅ មានទីតាំងស្ថិតនៅឃុំព្រែកស្លែង ស្រុក​កណ្តាលស្ទឹង ខេត្តកណ្តាល។ អាកាសយានដ្ឋាននេះ ក្រុមហ៊ុន ខេមបូឌា អ៊ែរផត អ៊ិនវេស​មិន ឯ.ក (CAIC) គឺជាក្រុមហ៊ុនចម្រុះបង្កើតឡើងរួមគ្នាដោយ ក្រុមហ៊ុន OCIC និង​រដ្ឋ​លេខា​ធិការ​ដ្ឋាន​អាកាសចរស៊ីវិលកម្ពុជាក្នុងឆ្នាំ២០១៨ ក្រោមការណែនាំរបស់សម្តេចតេជោ ហ៊ុន សែន អតី​ត​នាយករដ្ឋមន្រ្តី និងបច្ចុប្បន្នជាប្រធានព្រឹទ្ធសភា ដើម្បីធ្វើការងារ​សាង​សង់​ព្រលាន​យន្ត​ភ្នំ​ពេញ​ថ្មី​មួយ​នេះ។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជា​ព្រលាន​យន្ត​ហោះលំដាប់ F4 ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុង​ដំណាក់កាលទី១៕ អត្ថបទ៖ ឈិត បូរ៉ាវី