ប្រធានផ្នែកពាណិជ្ជកម្មរបស់សហភាពអឺរ៉ុប (EU) នេះ នៅថ្ងៃសុក្រ (ទី៣០ ខែឧសភា) នេះ បានប្រាប់ឲ្យដឹងថា «ការប្ដេជ្ញាចិត្តទាំងស្រុង» នៅតែមានក្នុងការឈានដល់កិច្ចព្រមព្រៀងជាមួយសហរដ្ឋអាមេរិក ដើម្បីបញ្ចៀសកុំឲ្យមានការដំឡើងពន្ធធ្ងន់ធ្ងរ បន្ទាប់ពីចៅក្រមអាមេរិក បានសម្រេចថា វិធានការដ៏ចម្រូងចម្រាសរបស់រដ្ឋបាលលោក Donald Trump គឺផ្ទុយពីរដ្ឋធម្មនុញ្ញ។

បន្ទាប់ពីមានការជជែកតាមទូរសព្ទ កាលពីថ្ងៃព្រហស្បតិ៍ (ទី២៩ ខែឧសភា) ជាមួយរដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick ស្នងការពាណិជ្ជកម្ម EU លោក Maros Sefcovic បានឲ្យដឹងនៅលើបណ្ដាញសង្គម X ថា៖ «យើងបានដាក់ពេលវេលា និងកិច្ចប្រឹងប្រែងគ្រប់យ៉ាងទៅក្នុងការស្វែងដំណោះស្រាយឆ្ពោះទៅមុខ ហើយវានៅតែជាអាទិភាពចម្បងរបស់ EU។ យើងនៅតែបន្តមានទំនាក់ទំនងជាប់ជានិច្ច»។ 

តែយ៉ាងណាក្ដី លោក Sefcovic មិនបានធ្វើអត្ថាធិប្បាយដោយផ្ទាល់ ជុំវិញការវិវត្តរបស់តុលាការនេះឡើយ។

គួរបញ្ជាក់ថា កាលពីថ្ងៃពុធ តុលាការពាណិជ្ជកម្មអន្តរជាតិអាមេរិក បានរារាំងមិនឲ្យចូលជាធរមាន សម្រាប់ពន្ធភាគច្រើនដែលត្រូវបានប្រកាស ចាប់តាំងពីលោក Trump ចូលកាន់តំណែងជាប្រធានាធិបតី។ តែតុលាការឧទ្ធរណ៍នៅថ្ងៃបន្ទាប់ បានអនុញ្ញាតដល់ការអនុវត្តវិធានការពន្ធលើការនាំចូលលើប្រទេសចិន និងដៃគូពាណិជ្ជកម្មផ្សេងទៀត។ ឥឡូវនេះ ការផ្អាករយៈពេលខ្លីនេះ នឹងអនុញ្ញាតឲ្យបន្តដំណើរការបណ្តឹងឧទ្ធរណ៍។

នៅមុននេះ លោក Sefcovic បានប្រាប់ថា លោកបានជជែកតាមទូរសព្ទជាមួយសមភាគីពាណិជ្ជកម្មអាមេរិករបស់លោក នៅថ្ងៃសុក្រ ថ្ងៃសៅរ៍ និងថ្ងៃចន្ទ ខណៈដែលភាគីទាំង២ បានបង្កើនកិច្ចពិភាក្សា បន្ទាប់ពីមានភាពតានតឹងកាលពីសប្តាហ៍មុន៕