មេបញ្ជាការកងកម្លាំងឃើដ ដែលគ្រប់គ្រងប្រទេសស៊ីរីភាគឦសាន បាននិយាយកាលពីថ្ងៃសុក្រថា ក្រុមរបស់លោក កំពុងមានទំនាក់ទំនងផ្ទាល់ជាមួយប្រទេសទួរគី ហើយថា លោកនឹងបើកចំហសម្រាប់ការកែលម្អទំនាក់ទំនង រួមទាំងការជួបជាមួយប្រធានាធិបតីនៃប្រទេសនេះគឺ លោក រ៉េសិប តាយីប អឺដូហ្កាន់ ផងដែរ។

ការអត្ថាធិប្បាយជាសាធារណៈ គឺជាមាគ៌ាការទូតដ៏សំខាន់មួយរបស់លោក Mazloum Abdi ដែលកងកម្លាំងប្រជាធិបតេយ្យស៊ីរី បានប្រយុទ្ធជាមួយទាហានទួរគី និងក្រុមឧទ្ទាមស៊ីរីដែលគាំទ្រដោយទីក្រុងអង់ការ៉ា ក្នុងអំឡុងសង្គ្រាមស៊ីវិលរយៈពេល ១៤ឆ្នាំ នៅក្នុងប្រទេសស៊ីរី។

ប្រទេសទួរគី បានលើកឡើងថា ក្រុមជនជាតិឃើដដ៏ធំដែលស្ថិតនៅក្នុងផ្នែកដ៏សំខាន់នៃកងកម្លាំងប្រជាធិបតេយ្យសេរី(SDF) គឺមិនអាចបំបែកពីក្រុមសកម្មប្រយុទ្ធនៃគណបក្សពលករឃើដ (PKK) ដែលបានសម្រេចចិត្តកាលពីដើមខែនេះ ដើម្បីរំសាយ បន្ទាប់ពីជម្លោះ ៤០ឆ្នាំ ជាមួយប្រទេសទួរគី។

លោក Abdi បានប្រាប់ទូរទស្សន៍ក្នុងតំបន់ Shams TV នៅក្នុងបទសម្ភាសន៍មួយ ដែលបានចាក់ផ្សាយកាលពីថ្ងៃសុក្រថា ក្រុមរបស់លោក កំពុងទាក់ទងជាមួយប្រទេសទួរគី ដោយមិនបានប្រាប់ថាតើបណ្តាញទំនាក់ទំនងនេះ ត្រូវបានបើកឡើង រយៈពេលយូរប៉ុនណានោះទេ។

លោក Abdi បាននិយាយថា៖«យើងមានទំនាក់ទំនងផ្ទាល់ បណ្តាញទំនាក់ទំនងផ្ទាល់ជាមួយប្រទេសទួរគី ក៏ដូចជាតាមរយៈអ្នកសម្រុះសម្រួល ហើយយើងសង្ឃឹមថា ទំនាក់ទំនងទាំងនេះ មានការរីកចម្រើនឡើង»។ ពុំមានការអត្ថាធិប្បាយភ្លាមៗពីប្រទេសទួរគីលើការលើកឡើងរបស់លោក Abdi ទេ។