ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ នាថ្ងៃទី៣១ ខែឧសភា ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស ជាអនុប្រធានទី១ គណៈកម្មការជាតិគ្រប់គ្រងគ្រោះមហន្តរាយ បានដឹកនាំគណៈប្រតិភូជាន់ខ្ពស់របស់គណៈកម្មាធិការជាតិគ្រប់គ្រងគ្រោះមហន្តរាយ ចូលរួមសម័យកិច្ចប្រជុំលើកទី៨ ស្ដីពីវេទិកាសកលសម្រាប់ការកាត់បន្ថយហានិភ័យគ្រោះមហន្តរាយ នៅទីក្រុងហ្សឺណេវ ប្រទេសស្វីស។

វេទិកាសកលនេះ គឺជាវេទិកាសកលសម្រាប់ គ្រប់ភាគីពាក់ព័ន្ធ ដែលមានអ្នកចូលរួមជាច្រើនរួមទាំង រដ្ឋាភិបាល ប្រព័ន្ធអង្គការសហប្រជាជាតិ សង្គមស៊ីវិល និង ភាគីពាក់ព័ន្ធដទៃទៀតមករួមគ្នា ដើម្បីពិនិត្យមើលវឌ្ឍនភាព នៃការអនុវត្តក្របខ័ណ្ឌការងារសេនដាយ សម្រាប់ការកាត់ បន្ថយហានិភ័យគ្រោះមហន្តរាយឆ្នាំ២០២៥-២០៣០ ដោយការចែករំលែកចំណេះដឹង ពិភាក្សាអំពីការអភិវឌ្ឍ និង និន្នាការចុងក្រោយបង្អស់ក្នុងការកាត់បន្ថយហានិភ័យគ្រោះមហន្តរាយ កំណត់គម្លាតចន្លោះខ្វះខាត និងផ្ដល់អនុសាសន៍ ដើម្បីពន្លឿនការអនុវត្តក្របខ័ណ្ឌការងារសេនដាយ។

ក្នុងឱកាសនោះ ឯកឧត្តមកិត្តិសង្គហបណ្ឌិត នឹងអញ្ជើញធ្វើថ្លែងការណ៍ចំនួន០២ គឺ ទី១ "វឌ្ឍនភាពក្នុងតំបន់លើការអនុវត្តក្របខណ្ឌការងារសេនដាយ និងអនុសាសន៍លើការត្រួតពិនិត្យឡើងវិញពាក់កណ្ដាលអាណត្តិ" និងទី២ " ពន្លឿនការផ្ដល់ហិរញ្ញប្បទានសម្រាប់ភាពធន់÷ដំណោះស្រាយសមស្របសម្រាប់ការកាត់បន្ថយហានិភ័យគ្រោះមហន្តរាយ។

តាមកម្មវិធីគ្រោងទុក ឯកឧត្តម អនុប្រធានទី១ គ.ជ.គ.ម. និងអញ្ជើញជួបតំណាងពិសេសរបស់អគ្គលេខាធិការអង្គការសហប្រជាជាតិ និងជាប្រធានលេខាធិការដ្ឋានអង្គការសហប្រជាជាតិទទួលបន្ទុកការងារកាត់បន្ថយហានិភ័យគ្រោះមហន្តរាយ។

វេទិកាសកលលើកទី៨ ស្ដីពីការកាត់បន្ថយហានិភ័យគ្រោះមហន្តរាយ (GP2025) នឹងប្រព្រឹត្តទៅនៅមជ្ឈមណ្ឌលសន្និសីទអន្តរជាតិទីក្រុងហ្សឺណែវ ចាប់ពីថ្ងៃទី០២ ដល់ ថ្ងៃទី០៦ ខែមិថុនា ឆ្នាំ២០២៥។ សម័យប្រជុំនេះរៀបចំដោយលេខាធិការដ្ឋានអង្គការសហប្រជាជាតិ ទទួលបន្ទុកការងារកាត់បន្ថយហានិភ័យគ្រោះមហន្តរាយ (UNDRR) និងដោយរដ្ឋាភិបាលនៃប្រទេសស្វីស៕