ក្រសួងការបរទេសចិន បាននិយាយនៅថ្ងៃអាទិត្យ (០១ មិថុនា) នេះថា ទីក្រុងប៉េកាំង បានដាក់ការតវ៉ាការទូតទៅកាន់សហរដ្ឋអាមេរិក ជុំវិញការលើកឡើងបែប "ប្រមាថមើលងាយ" ដែលធ្វើឡើងដោយរដ្ឋមន្ត្រីការពារជាតិអាមេរិក លោក Pete Hegseth ខណៈចោទប្រកាន់ថាអាមេរិក បានព្រងើយកន្តើយចំពោះការអំពាវនាវរកសន្តិភាពពីបណ្ដាប្រទេសក្នុងតំបន់។

ក្រសួងបានលើកឡើងថា ចិន បានជំទាស់នឹងលោក Hegseth ដែលហៅទីក្រុងប៉េកាំង ថាជាការគំរាមកំហែងនៅក្នុងឥណ្ឌូប៉ាស៊ីហ្វិក ដោយពណ៌នាការអត្ថាធិប្បាយរបស់លោកនៅឯកិច្ចសន្ទនាសន្តិសុខ Shangri-La ក្នុងប្រទេសសិង្ហបុរី កាលពីថ្ងៃសៅរ៍ ថាជារឿង "គួរឱ្យសោកស្តាយ" និង "មានបំណងសាបព្រួសការខ្វែងគំនិត"។

ក្រសួងបាននិយាយលើគេហទំព័ររបស់ខ្លួនថា "លោក Hegseth មានចេតនាមិនអើពើនឹងការអំពាវនាវឱ្យមានសន្តិភាព និងការអភិវឌ្ឍដោយប្រទេសក្នុងតំបន់ ហើយជំនួសមកវិញបានបង្អួតចិត្តគំនិតនៃសង្រ្គាមត្រជាក់សម្រាប់ការប្រឈមមុខដាក់គ្នានៅក្នុងប្លុក លាបពណ៌ប្រទេសចិនជាមួយនឹងការចោទប្រកាន់ដែលបង្ខូចកេរ្តិ៍ឈ្មោះ និងបានហៅប្រទេសចិន ដោយខុសឆ្គងថាជា "ការគំរាមកំហែង"។

ក្រសួងបានបន្ថែមនៅក្នុងសេចក្តីថ្លែងការណ៍នេះថា "សហរដ្ឋអាមេរិក បានដាក់ពង្រាយសព្វាវុធវាយលុកនៅសមុទ្រចិនខាងត្បូង ហើយបានបន្តបញ្ឆេះ និងបង្កើតភាពតានតឹងនៅក្នុងតំបន់អាស៊ីប៉ាស៊ីហ្វិក ដែលកំពុងប្រែក្លាយតំបន់នេះឱ្យទៅទីតាំងងាយកើតមានហិង្សា"។

គួរឱ្យដឹងថា លោក Hegseth បានអំពាវនាវដល់សម្ព័ន្ធមិត្តនៅក្នុងតំបន់ឥណ្ឌូប៉ាស៊ីហ្វិក រួមទាំងសម្ព័ន្ធមិត្តសន្តិសុខដ៏សំខាន់របស់ខ្លួនគឺអូស្ត្រាលី ឱ្យចំណាយប្រាក់បន្ថែមទៀតលើការការពារជាតិ បន្ទាប់ពីព្រមានអំពីការគំរាមកំហែង "ពិតប្រាកដ និងអាចកើតមានឡើង" ពីប្រទេសចិន៕