ក្រុមមន្ត្រីបាននិយាយនៅថ្ងៃអាទិត្យ (០១ មិថុនា) នេះថា ទឹកជំនន់យ៉ាងគំហុក និងបំណាក់ដី បន្ទាប់ពីភ្លៀងមូសុងដ៏ខ្លាំងក្លាក្នុងរយៈពេលពីរថ្ងៃចុងក្រោយនេះ បានសម្លាប់មនុស្សយ៉ាងហោចណាស់ ៣០នាក់ នៅភាគឦសាននៃប្រទេសឥណ្ឌា។

ក្រុមមន្ត្រីគ្រប់គ្រងគ្រោះមហន្តរាយរបស់រដ្ឋបាននិយាយថា មនុស្ស ៨នាក់បានស្លាប់នៅក្នុងរដ្ឋ Assam និង ៩ នាក់នៅ Arunachal Pradesh ដែលភាគច្រើននៃអ្នកទាំងនោះស្លាប់នៅក្នុងបំណាក់ដីដោយសារទឹកជំនន់ រួចក៏បានធ្លាក់ចូលទៅក្នុងជ្រលងភ្នំខាងក្រោម។

អាជ្ញាធររដ្ឋនិយាយថា មនុស្ស ៥នាក់ ផ្សេងទៀតបានស្លាប់នៅក្នុងបំណាក់ដីនៅរដ្ឋជិតខាង Mizoram។ ក្រុមមន្ត្រីបន្ថែមថា មនុស្ស ៦នាក់ បានស្លាប់នៅក្នុងទីក្រុង Meghalaya និងយ៉ាងហោចណាស់ ២នាក់ ផ្សេងទៀតបានស្លាប់នៅក្នុងរដ្ឋ Nagaland និង Tripura។

ការព្រមានពណ៌ក្រហមត្រូវបានដាក់ចេញសម្រាប់ស្រុកមួយចំនួនក្នុងតំបន់ បន្ទាប់ពីភ្លៀងធ្លាក់មិនឈប់ក្នុងពេលបីថ្ងៃចុងក្រោយនេះ។ កងទ័ពឥណ្ឌានិយាយថា ខ្លួនបានជួយសង្គ្រោះមនុស្សរាប់រយនាក់ "នៅក្នុងប្រតិបត្តិការជួយសង្គ្រោះដ៏ធំ" នៅទូទាំងរដ្ឋ Manipur។ គួរឱ្យដឹងថា មនុស្សរាប់សិបនាក់បានស្លាប់ជារៀងរាល់ឆ្នាំក្នុងរដូវវស្សា ដោយសារទឹកជំនន់យ៉ាងគំហុក និងបំណាក់ដីនៅទូទាំងប្រទេសឥណ្ឌា ដែលមានប្រជាជនសរុបចំនួន ១,៤ពាន់លាននាក់៕