កណ្ដាល៖ ក្រុមការងារគណបក្សចុះមូលដ្ឋានខេត្តកណ្តាល បានពិនិត្យ និងសម្រេចរួចរាល់ នៃការជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២ ដោយសម្រេចបាននូវបញ្ជីបេក្ខជនទាំងពេញសិទ្ធិ និងបម្រុង លើឃុំ-សង្កាត់ទាំង ១២៧ ក្នុងក្រុង-ស្រុកទាំង១១
ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រធានគណៈអចិន្ត្រៃយ៍គណៈកម្មាធិ-ការកណ្តាលគណបក្សប្រជាជន កម្ពុជា ថ្លែងក្នុងកិច្ចប្រជុំពិនិត្យសម្រេចលើបញ្ជីបេក្ខជនឈរឈ្មោះបោះឆ្នោតក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ២០២២ ថ្ងៃទី១៩ ខែធ្នូ ឆ្នាំ២០២១ នេះថា គណបក្សក្រុង-ស្រុកទាំងអស់ ដែលបានសហការគ្នាយ៉ាងជិតស្និទ្ធ និងបានយកចិត្តទុកដាក់ខ្ពស់ ក្នុងការបំពេញតួនាទី និងភារកិច្ចរបស់ខ្លួន ប្រកបដោយស្មារតីទទួលខុសត្រូវ ស្របតាមសេចក្តីសម្រេចរបស់គណៈកម្មាធិការកណ្ដាល ក្នុងផែនការរួមឆ្ពោះទៅកាន់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ និងផែនការសកម្មភាពរបស់ គណៈអចិន្ត្រៃយ៍ ក្រុមការងារគណបក្សចុះមូលដ្ឋានខេត្តកណ្តាល ស្តីពីផែនការសកម្មភាពឆ្ពោះទៅកាន់ការបោះឆ្នោតជ្រើសរើស ក្រុម ប្រឹក្សាឃុំ-សង្កាត់ អាណត្តិទី៥ ឆ្នាំ ២០២២ រហូតសម្រេចបាននូវបញ្ជីបេក្ខជនទាំងពេញសិទ្ធិ និងបម្រុងសម្រាប់គ្រប់ឃុំ-សង្កាត់ ទាំង ១២៧ ឃុំ-សង្កាត់ និង ១១ ក្រុង-ស្រុក ដែលនឹងត្រូវបានពិនិត្យ និងសម្រេចចុងក្រោយ ជាផ្លូវការនាពេលនេះ។
ពាក់ព័ន្ធការរៀបចំបញ្ជីបេក្ខជន ឯកឧត្តមអគ្គបណ្ឌិតសភាចារ្យ ឯកភាពលើលទ្ធផលរួម នៃការរៀបចំបញ្ជីបេក្ខជនឈរឈ្មោះ បោះឆ្នោតក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ របស់ខេត្តកណ្តា និងស្នើសុំឱ្យក្រុមការងារគណបក្សចុះមូលដ្ឋានបន្ត សហការ ជិតស្និទ្ធជាមួយគណបក្សមូលដ្ឋានគ្រប់ជាន់ថ្នាក់ និងយកចិត្តទុកដាក់អនុវត្តកិច្ចការជាអាទិភាពមួយចំនួនដូចជា៖ ត្រូវបន្តគ្រប់គ្រង ឱ្យបានល្អ នូវសភាពការណ៍, សន្តិសុខ, និងសណ្ដាប់ ធ្នាប់នៅតាមមូលដ្ឋាន តាមរយៈការអនុវត្ត គោលនយោបាយ ភូមិ-ឃុំ/សង្កាត់ មានសុវត្ថិ-ភាព។
ទន្ទឹមនេះ ត្រូវជំរុញការផ្សព្វផ្សាយអំពីច្បាប់, គោលការណ៍, សេចក្ដីណែនាំ និងវិធានការណ៍នានារបស់រាជរដ្ឋាភិបាល ក៏ដូចជាគោលការណ៍ណែនាំរបស់ក្រសួងសុខាភិបាល ក្នុងការទប់ស្កាត់ ការឆ្លងរីករាលដាលជំងឺកូវីដ-១៩ ក្នុងខណៈដែលជំងឺនេះ នៅតែបង្កហានិភ័យដល់ការសុខភាពសាធារណៈ និងការអភិវឌ្ឍសង្គម-សេដ្ឋកិច្ចរបស់យើង។
បន្តពង្រឹងការងារចុះមូលដ្ឋាននៅគ្រប់ថ្នាក់ឱ្យសកម្មជាប់ជាប្រចាំ ចាប់ពីពេលនេះតទៅ ដើម្បីរួមគ្នាខិតខំជួយគាំទ្រមូលដ្ឋាន ឃុំ/សង្កាត់ ក្នុងការគ្រប់គ្រងសមាជិកគណបក្ស, ការធ្វើបញ្ជីសមាជិកគណបក្ស, ការបញ្ចូលទិន្នន័យក្នុងប្រព័ន្ធកុំព្យូទ័រ, ការត្រៀមរៀបចំ កម្លាំង, មធ្យោបាយ, សម្ភារៈ, ថវិកា និងទីកន្លែងសម្រាប់រៀបចំសន្និបាតគណៈកម្មាធិការ គណបក្សឃុំ/សង្កាត់ និងការបំប៉នការងារអប់រំ នយោបាយដល់បេក្ខជនឈរឈ្មោះ ដើម្បីធ្វើសកម្មភាពឃោសនាបោះឆ្នោតតាមឃុំ/សង្កាត់ ព្រមទាំងការធានថា សមាជិកគណបក្ស និង អ្នកគាំទ្របក្ស ត្រូវមានអត្តសញ្ញាណប័ណ្ណគំរូថ្មីគ្រប់ៗគ្នា។ ត្រូវត្រៀមកម្លាំងមន្ត្រីគណបក្ស ពិសេសយុវជនតាមឃុំ/សង្កាត់ ដែលមាន លក្ខណៈសម្បត្តិ សមស្របឱ្យធ្វើភ្នាក់ងារតំណាងគណបក្ស សម្រាប់សង្កេតការណ៍នៅគ្រប់ការិយាល័យ បោះឆ្នោត និងរាប់សន្លឹក ឆ្នោតតាមឃុំ/សង្កាត់ និងត្រូវបានបំពាក់បំប៉នតួនាទី និងភារកិច្ចជូនពួកគាត់ឱ្យបានច្បាស់លាស់។
បន្តការក្ដាប់សភាពការណ៍, តាមដាន និងវាយតម្លៃការវិវត្តន៍គោលជំហរទស្សនៈនយោបាយ និងសតិអារម្មណ៍របស់ សមាជិកគណបក្ស និងអ្នកបោះ-ឆ្នោត ព្រមទាំងសកម្មភាពគណបក្សនយោបាយនានា ដើម្បីរក្សា និងពង្រឹងប្រៀបឈ្នះរបស់គណ បក្សប្រជាជនកម្ពុជា។ ត្រូវបង្កើនសកម្មភាពចិញ្ចឹមចលនានៅមូលដ្ឋាន តាមរយៈការការពារសុខភាពសាធារណៈ, ទប់ស្កាត់ការ ឆ្លងរីក រាលដាលនៃជំងឺកូវីដ-១៩ ពិសេសមេរោគបំប្លែងថ្មី (Omicron), ពង្រឹងការផ្ដល់សេវាសាធារណៈ, សេវារដ្ឋបាលមូលដ្ឋាន, ចុះសួរ សុខទុក្ខ និងជួយដល់ប្រជាជនក្រីក្រ, គ្រួសារ និងជនងាយរងគ្រោះ, ស្ត្រីទើបសម្រាលកូន និងកុមារកំព្រាជាដើម រួមជាមួយការ យកចិត្តទុកដាក់ពង្រឹងការគ្រប់គ្រង និងកសាងពង្រីកសមាជិកគណបក្ស តាមគោលការណ៍ "រក្សាចាស់, បង្កើនថ្មី" ជាពិសេស ក្នុងជួរយុវវ័យ និងកម្មករ-និយោជិត ដែលមានឈ្មោះក្នុងបញ្ជីបោះឆ្នោត និងដែលនឹងឈាន ចូលដល់អាយុបោះឆ្នោត៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
