រដ្ឋបាលរបស់លោកប្រធានាធិបតីអាមេរិក Donald Trump ចង់ឱ្យប្រទេសនានាដាក់សំណើផ្តល់ជូនដ៏ល្អបំផុតរបស់ពួកគេនៅក្នុងការចរចាពាណិជ្ជកម្មនៅត្រឹមថ្ងៃពុធ (០៤ មិថុនា) ស្អែកនេះ ខណៈក្រុមមន្ត្រីព្យាយាមពន្លឿនកិច្ចពិភាក្សាជាមួយដៃគូជាច្រើន នៅមុនថ្ងៃផុតកំណត់ពន្ធដែលលោក Trump បានដាក់ ក្នុងរយៈពេលត្រឹមតែ ៥សប្តាហ៍ខាងមុខទៀតប៉ុណ្ណោះ នេះបើយោងតាមសេចក្តីព្រាងលិខិតទៅកាន់ដៃគូចរចាដែលមើលឃើញដោយសារព័ត៌មានរ៉យទ័រ។

សេចក្តីព្រាង ដែលដាក់ចេញពីការិយាល័យតំណាងពាណិជ្ជកម្មសហរដ្ឋអាមេរិកនេះ បានផ្តល់នូវចន្លោះមួយពីវិធីសាស្រ្តដែលលោក Trump គ្រោងនឹងបញ្ចប់កិច្ចចរចាជាមួយប្រទេសរាប់សិប ដែលចាប់ផ្តើមនៅថ្ងៃទី០៩ ខែមេសា នៅពេលលោកផ្អាកពន្ធ "ថ្ងៃរំដោះ" ៩០ថ្ងៃ រហូតដល់ថ្ងៃទី០៨ ខែកក្កដា។

ឯកសារនោះបង្ហាញពីភាពបន្ទាន់នៅក្នុងរដ្ឋបាលអាមេរិក ក្នុងការបញ្ចប់កិច្ចព្រមព្រៀងប្រឆាំងនឹងកាលកំណត់ដ៏តឹងតែងរបស់ខ្លួន។ នៅក្នុងពង្រាង អាមេរិកកំពុងស្នើឱ្យប្រទេសនានារាយបញ្ជីសំណើដ៏ល្អបំផុតរបស់ពួកគេក្នុងផ្នែកសំខាន់ៗមួយចំនួន រួមទាំងការផ្តល់ជូនពន្ធ និងកូតាសម្រាប់ការទិញផលិតផលឧស្សាហកម្ម និងកសិកម្មរបស់អាមេរិក និងផែនការដើម្បីដោះស្រាយរបាំងមិនមែនពន្ធ។ ចំណុចស្នើផ្សេងទៀតរួមមានការប្តេជ្ញាចិត្តណាមួយលើពាណិជ្ជកម្មឌីជីថល និងសន្តិសុខសេដ្ឋកិច្ច រួមជាមួយនឹងការប្តេជ្ញាចិត្តជាក់លាក់របស់ប្រទេសចរចា នេះបើយោងតាមលិខិតមួយច្បាប់នោះ។

លិខិតបន្ថែមថា អាមេរិកនឹងវាយតម្លៃការឆ្លើយតបក្នុងពេលប៉ុន្មានថ្ងៃបន្ទាប់ និងផ្តល់ "ចំណុចបញ្ចប់សមស្របមួយដែលអាចកើតមាន" ដែលអាចរួមបញ្ចូលអត្រាពន្ធបដិការ។ គេមិនច្បាស់ទេថាប្រទេសណាខ្លះនឹងទទួលលិខិតនោះទេ ប៉ុន្តែពង្រាងនេះតម្រង់ទៅប្រទេសមានការចរចាសកម្ម ដែលរួមមានកិច្ចប្រជុំ និងការផ្លាស់ប្តូរឯកសារជាដើម។

ក្រុមមន្ត្រីអាមេរិកជាច្រើនដូចជាទីប្រឹក្សាសេដ្ឋកិច្ចសេតវិមាន លោក Kevin Hassett បានសន្យាម្តងហើយម្តងទៀតថា កិច្ចព្រមព្រៀងជាច្រើនជិតនឹងបញ្ចប់ហើយ ប៉ុន្តែមកទល់ពេលនេះ មានតែកិច្ចព្រមព្រៀងមួយប៉ុណ្ណោះដែលសម្រេចបានជាមួយដៃគូពាណិជ្ជកម្មរបស់អាមេរិក គឺចក្រភពអង់គ្លេស៕