ប្រធានាធិបតីអ៊ុយក្រែនបានប្រកាសថា រុស្ស៊ីចង់បានបទឈប់បាញ់ពីរ-បីថ្ងៃ ហើយប្រទេសរបស់លោកកំពុងត្រៀមការដោះដូរឈ្លើយសឹកថ្មី។ជាមួយគ្នានោះ លោកបានរិះគន់យ៉ាងខ្លាំងចំពោះសំណើរបស់រុស្ស៊ី ថាជារឿងផ្ដេសផ្ដាស។

លោក Vlodimir Zelensky បានរិះគន់គណៈប្រតិភូរុស្ស៊ីដែលចូលរួមក្នុងកិច្ចចរចានៅទីក្រុងអ៊ីស្តង់ប៊ុល ដោយបានច្រានចោលសំណើរបស់ទីក្រុងមូស្គូសម្រាប់បទឈប់បាញ់បណ្តោះអាសន្នដែលមានបំណងអនុញ្ញាតឱ្យភាគីនានាអាចយកសាកសពទាហានដែលបានស្លាប់។

លោក Zelenskyy បាននិយាយថា រុស្ស៊ីចង់ឱ្យមានបទឈប់បាញ់ពីរឬបីថ្ងៃដើម្បីប្រមូលសាកសពអ្នកស្លាប់។មេដឹកនាំអ៊ុយក្រែនរូបនេះ បានសង្កត់ធ្ងន់ថា បទឈប់បាញ់គឺជាការចាំបាច់ ដើម្បីទប់ស្កាត់ការស្លាប់តទៅទៀត។

ការចរចាជុំទីពីររវាងរុស្ស៊ី និងអ៊ុយក្រែននៅវិមាន Çırağan ក្នុងទីក្រុងអ៊ីស្តង់ប៊ុល ប្រទេសទួរគីកាលពីថ្ងៃទី ២ ខែមិថុនា បានបញ្ចប់ដោយមានរយៈពេលជាងមួយម៉ោង ដែលពុំអាចមើលឃើញពន្លឺនៃបទឈប់បាញ់ឈានឆ្ពោះទៅរកការបញ្ចប់ភ្លើងសង្គ្រាមជាង៣ឆ្នាំនោះទេ។

កន្លងមកអ៊ុយក្រែនធ្លាប់បានប្រគល់ឯកសារដែលមានលក្ខខណ្ឌបទឈប់បាញ់ទៅរុស្ស៊ី ប៉ុន្តែវិមានក្រឹមឡាំងមិនបានផ្តល់មតិកែលម្អទេ ហើយថាខ្លួននឹងបង្ហាញអនុស្សរណៈ គឺនិយាយតែក្នុងអំឡុងពេលកិច្ចប្រជុំប៉ុណ្ណោះ។

កាលពីថ្ងៃទី១៦ ខែឧសភា ការចរចាដោយផ្ទាល់រវាងអ៊ុយក្រែន និងរុស្ស៊ីជាលើកដំបូងក្នុងរយៈពេលជាង ៣ ឆ្នាំបានធ្វើឡើងនៅទីក្រុងអ៊ីស្តង់ប៊ុលដដែល។ ជាពិសេស កិច្ចព្រមព្រៀងមួយត្រូវបានសម្រេចលើការដោះដូរឈ្លើយសឹក១.០០០នាក់ ពីភាគីទាំងពីរ ដែលមានរយៈពេលបីដំណាក់កាល និងបានបញ្ចប់កាលពីថ្ងៃទី២៥ ខែឧសភា៕