អ៊ីស្រាអែល បានបង្កើនប្រតិបត្តិការយោធារបស់ខ្លួននៅភាគខាងជើង និងខាងត្បូងនៃតំបន់ហ្កាហ្សាស្រ្ទីប ក្នុងមួយសប្ដាហ៍កន្លងទៅនេះ។ ប្រព័ន្ធផ្សព្វផ្សាយជាច្រើនបានរាយការណ៍ថា នៅទីក្រុង Khan Younis ភាគខាងត្បូង កងទ័ពអ៊ីស្រាអែលបានវាយរុលឆ្ពោះទៅកាន់មន្ទីរពេទ្យអ៊ឺរ៉ុប ហើយបានកម្ទេចជញ្ជាំងខាងក្រោយនៃមជ្ឈមណ្ឌលវេជ្ជសាស្ត្រនោះ។

ជាមួយគ្នានេះ ក្រសួងសុខាភិបាលដែនដីប៉ាឡេស្ទីននិយាយថា យោធាអ៊ីស្រាអែល បានទម្លាក់គ្រាប់បែកលើមជ្ឈមណ្ឌលលាងឈាមដែលនៅសេសសល់តែមួយគត់សម្រាប់អ្នកមានជំងឺខូចក្រលៀនរបស់ហ្កាហ្សានៅភាគខាងជើង។ ប្រមុខកងទ័ពអ៊ីស្រាអែល លោក Eyal Zamir និយាយថា ការពង្រីកប្រតិបត្តិការជើងគោក នឹងបន្តរហូតដល់ចំណាប់ថ្នូរនៅសេសសល់ក្នុងដៃក្រុមហាម៉ាស ត្រូវបានដោះលែងទាំងអស់ និងការកម្ចាត់ក្រុមនេះ។

កាលពីថ្ងៃអាទិត្យចុងសប្ដាហ៍មុន ក្រុមហាម៉ាស បានចេញសេចក្តីថ្លែងការណ៍មួយដោយបញ្ជាក់ថា ពួកគេត្រៀមខ្លួនជាស្រេចសម្រាប់ការចរចាដោយប្រយោល ជុំវិញបទឈប់បាញ់ថ្មីនៅតំបន់ហ្កាហ្សាភ្លាមៗ។ ប៉ុន្តែអ៊ីស្រាអែលនៅមិនទាន់ឆ្លើយតបនឹងសេចក្តីថ្លែងការណ៍របស់ក្រុមនេះនៅឡើយទេ។

អ៊ីស្រាអែល បានចាប់ផ្តើមសង្រ្គាមរបស់ខ្លួននៅហ្កាហ្សា កាលពីថ្ងៃទី០៧ ខែតុលា ឆ្នាំ២០២៣ បន្ទាប់ពីពួកភេរវករហាម៉ាស បានសម្លាប់មនុស្ស ១.២០០នាក់នៅអ៊ីស្រាអែល និងបានចាប់ចំណាប់ថ្នូរ ២៥១នាក់ នេះបើតាមតួលេខអ៊ីស្រាអែល។ ចាប់តាំងពីពេលនោះមក អ៊ីស្រាអែលបានសម្លាប់មនុស្សជាង ៥៤.០០០នាក់ នៅក្នុងតំបន់ហ្កាហ្សា នេះបើយោងតាមក្រសួងសុខាភិបាលប៉ាឡេស្ទីន៕