សេតវិមានបាននិយាយថា ប្រធានាធិបតីអាមេរិក លោក Donald Trump "បើកចំហ" ដើម្បីជួបសមភាគីរុស្ស៊ី លោក Vladimir Putin និងមេដឹកនាំអ៊ុយក្រែន លោក Volodymyr Zelenskiy នៅក្នុងប្រទេសទួរគី បន្ទាប់ពីភាគីទាំងពីរបានបរាជ័យកាលពីថ្ងៃចន្ទ (០២ មិថុនា) ក្នុងការឆ្ពោះទៅរកបទឈប់បាញ់មួយក្នុងសង្រ្គាមអាយយុកាលជាង ៣ឆ្នាំមកនេះ។

ទោះជារកមិនបានបទឈប់បាញ់ភ្លាមៗក៏ដោយ គណៈប្រតិភូមកពីភាគីទាំងពីរបានយល់ព្រមផ្លាស់ប្តូរឈ្លើយសឹកទ្រង់ទ្រាយធំមួយផ្សេងទៀត នៅក្នុងកិច្ចប្រជុំលើកទី២ របស់ពួកគេនៅទីក្រុងអ៊ីស្តង់ប៊ុល ដែលកាលពីពាក់កណ្តាលខែឧសភា ក៏បានរៀបចំកិច្ចពិភាក្សាទល់មុខគ្នាជាលើកដំបូង។

ប្រធានាធិបតីទួរគី លោក Tayyip Erdogan បានស្នើឱ្យលោក Putin លោក Zelenskiy និងលោក Trump ទៅជួបគ្នានៅក្នុងកិច្ចប្រជុំលើកទីបីនៅចុងខែនេះ នៅទីក្រុងអ៊ីស្តង់ប៊ុល ឬទីក្រុងអង់ការ៉ា។ រហូតមកដល់ពេលនេះ លោក Putin បានបដិសេធការជួបប្រជុំបែបនេះ ប៉ុន្តែលោក Zelenskiy និយាយថា លោកមានឆន្ទៈធ្វើជំនួបនោះ ដោយគូសបញ្ជាក់ថា បញ្ហាសំខាន់ៗអាចដោះស្រាយបានតែនៅថ្នាក់ដឹកនាំប៉ុណ្ណោះ។

អ្នកនាំពាក្យសេតវិមាន លោកស្រី Karoline Leavitt បាននិយាយនៅក្នុងទីក្រុងវ៉ាស៊ីនតោនថា លោក Trump ដែលចង់បញ្ចប់សង្គ្រាមជាង ៣ឆ្នាំយ៉ាងឆាប់រហ័ស បានលើកឡើងថា លោក "បើកចំហសម្រាប់ជំនួបកំពូលត្រីភាគីអាមេរិក-រុស្ស៊ី-អ៊ុយក្រែន ប្រសិនបើរឿងនេះអាចកើតឡើង ហើយលោកចង់ឱ្យមេដឹកនាំទាំងពីរ និងភាគីទាំងសងខាងមកអង្គុយតុចរចារួមគ្នា"៕