សម្ព័ន្ធយោធា NATO បានធ្វើសមយុទ្ធហ្វឹកហាត់យោធានៅឯមូលដ្ឋានកងទ័ព Krivolak នៅភាគកណ្តាលប្រទេសម៉ាសេដូនីខាងជើង កាលពីថ្ងៃចន្ទ ទី២ ខែមិថុនា ដោយមានការចូលរួមពីទាហានប្រហែល ២.២០០នាក់មកពីប្រទេសជាច្រើន។

អតីតសាធារណរដ្ឋយូហ្គោស្លាវីមួយនេះ បានក្លាយជាសមាជិកទី ៣០នៃសម្ព័ន្ធមិត្តយោធាដឹកនាំដោយសហរដ្ឋអាមេរិក កាលពីខែមេសា ឆ្នាំ២០២០ ដោយបានបញ្ចប់ដំណើរការយូរអង្វែង ដែលរួមបញ្ចូលទាំងការផ្លាស់ប្តូរឈ្មោះប្រទេស។

ទាហាន និងយានរថពាសដែកយោធា បានចូលរួមក្នុងសមយុទ្ធ «ឆ្លើយតបបន្ទាន់ ដែលរួមមានការអនុវត្តគោលដៅ និងប្រើប្រាស់ឧទ្ធម្ភាគចក្រ។ សមយុទ្ធឆ្លើយតបបន្ទាន់ រួមមានការបាញ់គ្រាប់ពិតពហុជាតិសាសន៍ដែលធ្វើឡើងជាមួយបណ្តាញណាតូ ដោយមានកងទ័ពប្រមាណ ១២.០០០ នាក់ បានមកពីទូទាំងទ្វីបអឺរ៉ុបចូលរួម។

អគ្គលេខាធិការសម្ព័ន្ធយោធាណាតូ លោក Mark Rutte កាលពីថ្ងៃចន្ទ បានអំពាវនាវឱ្យបណ្តាប្រទេសនៅអឺរ៉ុប «ពង្រឹងការរារាំង និងការពារខ្លួន» ចំពោះរុស្ស៊ី និងអំពើភេរវកម្ម។

ថ្លែងនៅចុងបញ្ចប់នៃកិច្ចប្រជុំកំពូលនៃបណ្តាប្រទេសអឺរ៉ុបខាងជើង នៅទីក្រុង វីលនុស(Vilnius) ប្រទេសលីទុយអានី លោក Rutte បាននិយាយថា លោករំពឹងថាកិច្ចប្រជុំកំពូលរបស់ណាតូនៅទីក្រុងឡាអេ នៅចុងខែនេះ នឹងទទួលបានការជំរុញ «ផលិតកម្មឧស្សាហកម្មការពារជាតិ និងបង្កើនការវិនិយោគលើវិស័យការពារជាតិ»។