អតីតរដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock ត្រូវបានបោះឆ្នោតជ្រើសរើសជាប្រធានមហាសន្និបាតអង្គការសហប្រជាជាតិ ទោះបីជាមានការប្រឆាំងយ៉ាងខ្លាំងពីរុស្ស៊ីក៏ដោយ។ ភាពជាប្រធាន ត្រូវប្តូរវេនជារៀងរាល់ឆ្នាំ ក្នុងចំណោមក្រុមប្រចាំតំបន់ចំនួន៥ក្រុម។ លោកស្រី Baerbock ត្រូវបានគេរំពឹងថានឹងត្រូវបានជ្រើសរើសដោយគ្មានការបោះឆ្នោតដើម្បីដឹកនាំកិច្ចប្រជុំលើកទី៨០ នៃមហាសន្និបាតដែលនឹងចាប់ផ្តើម នៅខែកញ្ញា។

ទោះជាយ៉ាងណា មន្ត្រីអង្គការសហប្រជាជាតិនិយាយថា រុស្ស៊ី ដែលបានប្រឆាំងទៅនឹងបេក្ខភាពរបស់លោកស្រី Baerbock បានស្នើសុំការបោះឆ្នោតដ៏កម្រមួយកាលពីថ្ងៃចន្ទ ទោះបីជាអតីតរដ្ឋមន្ត្រីការបរទេសរូបនេះជាបេក្ខជនតែម្នាក់គត់ក៏ដោយ។ លោកស្រី Baerbock ទទួលបានសំឡេងឆ្នោត ១៦៧ សំឡេងនៅក្នុងការបោះឆ្នោតសម្ងាត់មួយ ខណៈប្រទេសចំនួន១៤ បានអនុប្បវាទ។ ការបោះឆ្នោតនេះ បានធ្វើឡើងបន្ទាប់ពីតំណាងរុស្ស៊ីម្នាក់ បានរិះគន់លោកស្រី កាលពីខែមុន។ បេសកជនរូបនោះ បានចោទលោកស្រីពីបទបង្ខូចកេរ្តិ៍ឈ្មោះប្រទេសដទៃ។ អ្នកតំណាងរូបនេះ ក៏បានអះអាងផងដែរថា លោកស្រី Baerbock បានជំរុញទឹកចិត្តឱ្យប្រទេសនានាផ្តល់ជំនួយយោធាបន្ថែមទៀតដល់អ៊ុយក្រែន និងបានជំរុញឱ្យបណ្តាប្រទេសអឺរ៉ុប បង្កើនថវិកាយោធារបស់ពួកគេ។

លោកស្រី Baerbock បាននិយាយក្នុងសុន្ទរកថាទទួលយកថា អង្គការសហប្រជាជាតិកំពុងស្ថិតក្រោមសម្ពាធយ៉ាងខ្លាំង ទាំងនយោបាយ និងហិរញ្ញវត្ថុ។ «យើងក៏ចាំបាច់ត្រូវចូលរួមផងដែរក្នុងកិច្ចខិតខំប្រឹងប្រែងនៅពេលនេះ ដើម្បីរក្សានូវអ្វីដែលអង្គការសហប្រជាជាតិសម្រេចបាន ចាប់តាំងពីការបង្កើតឡើងក្នុងឆ្នាំ១៩៤៥ ដើម្បីដោះស្រាយវិបត្តិពិភពលោកនាពេលបច្ចុប្បន្ន និងដើម្បីសម្របខ្លួនទៅនឹងបញ្ហាប្រឈមនាពេលអនាគតដែលនឹងកើតមាន»។