អាជ្ញាធរអ៊ីតាលីបាននិយាយថា ការផ្ទុះដ៏ធំនៅលើភ្នំភ្លើង Etna បានបង្ខំអ្នកទេសចរឱ្យរត់ភៀសខ្លួនយ៉ាងភ័យស្លន់ស្លោគេចចេញពីគ្រោះថ្នាក់ កាលពីថ្ងៃចន្ទ (០២ មិថុនា) បន្ទាប់ពីមានផ្សែងយ៉ាងខ្មួលខ្មាញ់ដែលមានសីតុណ្ហភាពខ្ពស់ សំណុំផេះ និងកម្ទេចថ្ម "កម្ពស់ជាច្រើនគីឡូម៉ែត្រ" បានផ្ទុះឡើងទៅលើផ្ទៃមេឃ គ្របដណ្ដប់លើទីតាំងទេសចរជាច្រើន។

វីដេអូដែលបង្ហោះនៅលើប្រព័ន្ធផ្សព្វផ្សាយសង្គម បង្ហាញពីមនុស្សម្នាតម្រង់ជួរយ៉ាងវែងដែលប្រញាប់ចេញពីទីតាំងជិតបន្ទុះភ្នំភ្លើង ខណៈម្ចាស់ក្រុមហ៊ុនទេសចរណ៍មួយបានប្រាប់សារព័ត៌មាន CNN ថា ក្រុមទេសចររបស់ពួកគេនាំមនុស្សប្រហែល ៤០នាក់ ឡើងលើភ្នំភ្លើងរបស់កោះ Sicily ដ៏ស្រស់ស្អាតមួយនោះនៅពេលការផ្ទុះកើតឡើង។

វិទ្យាស្ថានជាតិភូគព្ភសាស្ត្រ និងអង្កេតភ្នំភ្លើង បានឱ្យដឹងថា អ្នកទេសចរ និងអ្នកកម្សាន្តទាំងអស់លើភ្នំភ្លើងនោះ ត្រូវជម្លៀសដោយសុវត្ថិភាព នៅពេលបន្ទុះកើតឡើង។ ក្រុមអង្កេតនិយាយថា ភ្នំភ្លើងបានផ្ទុះនៅពេលល្ងាចម៉ោងក្នុងស្រុក ហើយលំហូរកម្អែភ្នំភ្លើងទាំងបីប្រភេទ “ពេលនេះបានចុះត្រជាក់ហើយ”។

ភ្នំភ្លើងនៅលើកោះអ៊ីតាលីមួយនេះគឺជាគោលដៅទេសចរណ៍ដ៏ពេញនិយម ដែលបានទៅទស្សនាដោយមនុស្ស ១,៥លាននាក់ ក្នុងមួយឆ្នាំ ដែលភាគច្រើនធ្វើដំណើរស្ទើរតែគ្រប់ផ្លូវទៅកាន់កំពូលភ្នំ។ ទោះបីជាភ្នំ Etna គឺជាភ្នំភ្លើងបន្ទុះសកម្មបំផុតមួយរបស់ពិភពលោកក៏ដោយ ក៏មិនដែលមានការផ្ទុះកម្រិតធំបែបនេះឡើយចាប់តាំងពីឆ្នាំ២០១៤ មក នេះបើយោងតាមក្រុមអង្កេតភ្នំភ្លើង៕