ប្រព័ន្ធផ្សព្វផ្សាយរបស់សហរដ្ឋអាមេរិកនិយាយថា សហរដ្ឋអាមេរិកបានស្នើឱ្យប្រទេសអ៊ីរ៉ង់ធ្វើការចម្រាញ់សារធាតុអ៊ុយរ៉ានីញ៉ូមក្នុងកម្រិតទាបនៅលើទឹកដីរបស់ខ្លួន។ លោកប្រធានាធិបតី Donald Trump បានបង្ហោះការបដិសេធភ្លាមៗ។ កាលពីថ្ងៃច័ន្ទសារព័ត៌មាន Axios បានរាយការណ៍ពីអ្វីដែលខ្លួនបាននិយាយថាគឺជាព័ត៌មានលម្អិតនៃសំណើរបស់សហរដ្ឋអាមេរិក ដែលបានធ្វើឡើងទៅកាន់ប្រទេសអ៊ីរ៉ង់ ដោយដកស្រង់ប្រភពដឹងផ្ទាល់អំពីបញ្ហានេះ។

រដ្ឋបាល របស់លោក Trump បាននឹងកំពុងដាក់សម្ពាធលើប្រទេសអ៊ីរ៉ង់ ឱ្យបញ្ឈប់ទាំងស្រុងនូវការចម្រាញ់សារធាតុអ៊ុយរ៉ានីញ៉ូមរបស់ខ្លួន។ ភាគីទាំងពីរបានចូលរួមក្នុងការចរចាជាច្រើនជុំ ប៉ុន្តែបានបរាជ័យក្នុងការបង្រួមការខ្វែងគំនិតគ្នា។ សារព័ត៌មាន Axios និយាយថា សំណើចុងក្រោយនឹងមិនអនុញ្ញាតឱ្យអ៊ីរ៉ង់សាងសង់រោងចក្រចម្រាញ់ថ្មីឡើយ និងបានអំពាវនាវឱ្យបញ្ឈប់ការស្រាវជ្រាវ និងការអភិវឌ្ឍន៍ថ្មីលើម៉ាស៊ីនចម្រាញ់។

លោក Trump បានឆ្លើយតបនៅក្នុងការបង្ហោះលើបណ្តាញផ្សព្វផ្សាយសង្គមថា «ក្រោមកិច្ចព្រមព្រៀងដ៏មានសក្តានុពលរបស់យើង យើងនឹងមិនអនុញ្ញាតឱ្យមានការចម្រាញ់សារធាតុអ៊ុយរ៉ានីញ៉ូមឡើយ»។

ទីភ្នាក់ងារសារព័ត៌មាន Reuters បានដកស្រង់សម្តីរបស់អ្នកការទូតជាន់ខ្ពស់ដែលស្និទ្ធនឹងក្រុមចរចារបស់អ៊ីរ៉ង់ថា «អ៊ីរ៉ង់ កំពុងធ្វើសេចក្តីព្រាងការឆ្លើយតបអវិជ្ជមាន ចំពោះសំណើរបស់សហរដ្ឋអាមេរិក»។