សហភាពអឺរ៉ុប បានព្រមានថា ខ្លួនអាចនឹងពន្លឿនវិធានការសងសឹកយ៉ាងចាស់ដៃ ប្រសិនបើលោកប្រធានាធិបតីអាមេរិក Donald Trump ធ្វើតាមការគំរាមកំហែងដំឡើងពន្ធរបស់លោកចុងក្រោយបំផុត ដែលរួមមានពន្ធ ៥០% លើការនាំចូលដែកថែប និងអាលុយមីញ៉ូម ហើយក៏កំពុងរៀបចំកិច្ចចរចាពាណិជ្ជកម្មមួយផ្សេងទៀតជាមួយទីក្រុងវ៉ាស៊ីនតោន។

គណៈកម្មការអឺរ៉ុប ដែលគ្រប់គ្រងបញ្ហាពាណិជ្ជកម្មប្លុកអឺរ៉ុប កាលពីថ្ងៃចន្ទ (០២ មិថុនា) បានសម្ដែង "ការសោកស្តាយ" យ៉ាងខ្លាំងចំពោះការដំឡើងពន្ធលោហធាតុនោះ - ដែលកើនឡើងពីផែនការដំបូង ២៥% - ហើយនិយាយថា ពន្ធកំពុងធ្វើឱ្យខូចដល់កិច្ចប្រឹងប្រែងរកដំណោះស្រាយជម្លោះពាណិជ្ជកម្ម។

សហភាពអឺរ៉ុប បានអនុម័តពន្ធលើទំនិញអាមេរិក ចំនួន ២១ពាន់លានអឺរ៉ូ (២៤ ពាន់លានដុល្លារ) ជាការឆ្លើយតបទៅនឹងការយកពន្ធលោហធាតុរបស់លោក Trump ដែលអាចត្រូវបានអនុវត្តយ៉ាងឆាប់រហ័ស។ ប្លុកនេះក៏កំពុងរៀបចំបញ្ជីពន្ធបន្ថែមលើផលិតផលអាមេរិកចំនួន ៩៥ពាន់លានអឺរ៉ូផងដែរ។

លោក Olof Gill អ្នកនាំពាក្យគណៈកម្មការអឺរ៉ុប បាននិយាយថា "ប្រសិនបើគ្មានដំណោះស្រាយដែលអាចទទួលយកបានទៅវិញទៅមកទេ នោះទាំងវិធានការប្រឆាំងដែលមានស្រាប់ និងបន្តបន្ទាប់របស់អឺរ៉ុប នឹងចូលជាធរមានដោយស្វ័យប្រវត្តិនៅថ្ងៃទី១៤ ខែកក្កដា ឬមុននោះទៅទៀត ប្រសិនបើកាលៈទេសៈទាមទារ"។ គួរឱ្យដឹងថា អឺរ៉ុបកំពុងព្យាយាមតាមដានការចរចារជាមួយអាមេរិក ឱ្យបានមុនពេលកំណត់នៅថ្ងៃទី០៩ ខែកក្កដា ជាពេលវេលាដែលលោក Trump គំរាមថា លោកនឹងវាយលុកស្ទើរតែទាំងអស់នៃការនាំចូលរបស់ប្លុកនេះជាមួយនឹងពន្ធ ៥០%៕