នាយករដ្ឋមន្ត្រីអង់គ្លេស លោក Keir Starmer កាលពីថ្ងៃចន្ទ (ទី២ ខែមិថុនា) បានប្តេជ្ញាថា នឹងនាំប្រទេសរបស់លោកឲ្យទៅកាន់ដំណាក់កាល «ត្រៀមខ្លួនប្រយុទ្ធ» ដោយប្រកាសផែនការបង្កើននាវាមុជទឹកវាយប្រហារថ្មីរហូតដល់ទៅ ១២គ្រឿង និងបណ្តាក់ទុនលើអាវុធរាប់លានផោន ដើម្បីធ្វើឲ្យប្រទេសកាន់តែរឹងមាំ ប្រឈមជាមួយពិភពលោកមួយដែលជាប់នៅក្នុងបញ្ហាអរិភាព ភាពឃគ្លើនរបស់រុស្ស៊ី និងការបន្ថយសកម្មភាពជាអន្តរជាតិរបស់សហរដ្ឋអាមេរិក។

គម្រោងបំពាក់អាវុធប្រកបដោយមហិច្ឆតានេះ គឺជាផ្នែកមួយនៃការពិនិត្យឡើងវិញជាយុទ្ធសាស្ត្ររបស់រដ្ឋាភិបាល ដែលបានពន្យល់យ៉ាងច្បាស់ៗពីពិភពលោកមួយដ៏គ្រោះថ្នាក់ ហើយបានលើកឡើងថា ត្រូវបង្កើនការផលិតយានដ្រូន ខណៈដែលត្រូវស្តុកគ្រាប់រំសេវ និងគ្រឿងយុទ្ធោបករណ៍បន្ថែមទៀត។

កាលពីថ្ងៃទី២ ខែមិថុនា នៅឯកន្លែងសាងសង់នាវា ក្នុងទីក្រុង Glasgow ប្រទេសស្កុតឡែន លោក Starmer បាននិយាយថា៖ «ការគំរាមកំហែងដែលយើងប្រឈមជាមួយ នាពេលនេះ គឺធ្ងន់ធ្ងរ បន្ទាន់ និងមិនអាចទាយទុកជាមុនបាន ជាងពេលណាៗទាំងអស់ គិតចាប់តាំងពីសម័យសង្គ្រាមត្រជាក់មក»។ លោកបានលើកឡើងសំដៅទៅ «សង្រ្គាមនៅអឺរ៉ុប ហានិភ័យនុយក្លេអ៊ែរថ្មី ការវាយប្រហារតាមប្រព័ន្ធអ៊ីនធឺណិតរាល់ថ្ងៃ» និង «ការកើនឡើងនូវសកម្មភាពគឃ្លើនរបស់រុស្ស៊ី» ទាំងនៅក្នុងដែនទឹក និងដែនអាកាសរបស់អង់គ្លេស។

ដើម្បីគូសបញ្ជាក់ពីសារព្រមានរបស់លោក លោក Starmer បានបង្ហាញផែនការរបស់លោក ដែលមានរយៈពេលត្រឹមតែប៉ុន្មានម៉ោងបន្ទាប់ពីមានការទម្លាក់គ្រាប់បែកពីលើអាកាសដ៏ខ្លាំងក្លាបំផុតមួយ ក្នុងសង្រ្គាមរយៈពេល ៣ឆ្នាំ នៅប្រទេសអ៊ុយក្រែន ដោយយានដ្រូនរបស់អ៊ុយក្រែនបានវាយប្រហារមូលដ្ឋានទ័ពអាកាសយ៉ាងជ្រៅក្នុងដែនដីរុស្ស៊ី៕