ក្រុមអ្នកស្រាវជ្រាវអាមេរិក បាននិយាយនៅថ្ងៃពុធ (០៤ មិថុនា) នេះថា ប្រទេសកូរ៉េខាងជើង ហាក់ដូចជាបានលើកតម្រង់នាវាពិឃាត Choe Hyun Class ដែលបានក្រឡាប់ដោយផ្នែករបស់ខ្លួន ឱ្យវិលត្រឡប់ទៅរកទីតាំងត្រឹមត្រូវវិញ បន្ទាប់ពីបរាជ័យដ៏អាម៉ាសក្នុងអំឡុងពេលពិធីដាក់ដំណើរការ។

មេដឹកនាំ លោក គីម ជុងអ៊ុន ដែលបានមើលឃើញការបរាជ័យនាវាចម្បាំងទម្ងន់ ៥.០០០តោននេះដោយផ្ទាល់ បាននិយាយថា ឧបទ្ទវហេតុនេះបានធ្វើឱ្យខូចដល់សេចក្តីថ្លៃថ្នូររបស់ប្រទេស ហើយបានប្តេជ្ញាថានឹងដាក់ទណ្ឌកម្មអ្នកដែលទទួលខុសត្រូវ។

រូបភាពពីផ្កាយរណបពាណិជ្ជកម្មពីថ្ងៃទី០២ ខែមិថុនា បានបង្ហាញនាវាពិឃាតត្រូវតម្រង់ឱ្យបញ្ឈរត្រង់ជាលើកដំបូង ចាប់តាំងពីឧបទ្ទវហេតុកាលពីថ្ងៃទី២១ ខែឧសភា នេះបើតាមរបាយការណ៍មួយពីកម្មវិធី 38North ដែលសិក្សាពីកូរ៉េខាងជើងដែលមានអាវុធនុយក្លេអ៊ែរ។

ចាប់តាំងពីឧបទ្ទវហេតុនេះមក កូរ៉េខាងជើងនិយាយថា ខ្លួនបានឃុំមន្ត្រីមួយចំនួន ហើយលោក គីម បានបញ្ជាឱ្យជួសជុលនាវា មុនពេលកិច្ចប្រជុំរបស់គណបក្សកាន់អំណាចក្នុងខែនេះ។ 38North បាននិយាយនៅក្នុងរបាយការណ៍របស់ខ្លួនថា "រូបភាពផ្កាយរណបពាណិជ្ជកម្មបង្ហាញកម្មករនៅកំពង់ផែ Chongjin បានបោះជំហានដ៏សំខាន់មួយឆ្ពោះទៅរកគោលដៅដែលលោក គីម បានដាក់នោះ"៕