ភ្នំពេញ៖ ប្រធានការិយាល័យរដ្ឋបាលស្តីទីនៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) ថ្លែងអំណរគុណ ចំពោះរដ្ឋាភិបាលអាល្លឺម៉ង់ ដែលជាប្រទេសម្ចាស់ជំនួយមួយរបស់សាលាក្តីខ្មែរក្រហម ដែលបានគាំទ្រ និងផ្តល់វិភាគទានស្ម័គ្រចិត្តជួយទ្រទ្រង់ដំណើរការតុលាការខ្មែរក្រហម ចាប់តាំងពីការចាប់ផ្តើម រហូតមក ដល់បច្ចុប្បន្ននេះដោយបានផ្តល់គាំទ្រចំពោះដំណើរការតុលាការទូទៅ និងការចូលរួមរបស់ជនរងគ្រោះ ក្នុងដំណើរការតុលាការ។ ការថ្លែងនេះធ្វើឡើងនៅក្នុងអំឡុងដំណើរទស្សនកិច្ចរបស់លោក គ្រីស្ទៀន ប៊ែហ្គ័រ (Christian Berger) ឯកអគ្គរដ្ឋទូតអាល្លឺម៉ង់ប្រចាំកម្ពុជានៅសាលាក្តីខ្មែរក្រហមនាព្រឹកថ្ងៃទី២១ ខែធ្នូ ឆ្នាំ២០២១។

ដំណើរទស្សនកិច្ចរបស់ឯកឧត្តមឯកអគ្គរដ្ឋទូតអាល្លឺម៉ង់ប្រចាំកម្ពុជានៅសាលាក្តីក្នុងគោលបំណង ដើម្បី ស្វែងយល់ពីដំណើរការវិវឌ្ឍថ្មីៗរបស់សាលាក្តីខ្មែរក្រហម និងកិច្ចការដែលសាលាក្តីខ្មែរក្រហម នឹងបន្តធ្វើ សម្រាប់ពេលខាងមុខ ក្រោយពេលសំណុំរឿងត្រូវបានបញ្ចប់នីតិវិធីច្បាប់។

ឯកឧត្តមឯកអគ្គរដ្ឋទូតបាន វាយតម្លៃខ្ពស់ចំពោះសមិទ្ធផលដែលសាលាក្តីខ្មែរក្រហមសម្រេចបានក្នុងដំណើរស្វែងរកការពិត និង យុត្តិធម៌ជូនជនរងគ្រោះនៃរបបខ្មែរក្រហម។

ឯកឧត្តម ក្រាញ់ តូនី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានការិយាល័យស្តីទី នៃ អ.វ.ត.ក បានជម្រាបជូនឯកឧត្តមឯកអគ្គរដ្ឋទូតអាល្លឺម៉ង់អំពីដំណើរការវិវឌ្ឍថ្មីនៃសំណុំរឿង ដែលនៅសេសសល់ ព្រមទាំងកិច្ចការមួយចំនួនដែលតុលាការនឹងធ្វើក្រោយពេលសំណុំរឿងទាំងអស់ដែលមានចំពោះមុខអង្គ ជំនុំជម្រះត្រូវបានបញ្ចប់នីតិវិធី។

ឯកឧត្តម ក្រាញ់ តូនី បានមានប្រសាសន៍ថា៖«ក្រោយសំណុំរឿងត្រូវបានបញ្ចប់នីតិវិធីច្បាប់រួចរាល់ កិច្ច ការដែលតុលាការនឹងបន្តធ្វើគឺផ្តោតសំខាន់លើការងារផ្សព្វផ្សាយសមិទ្ធផលការងាររបស់តុលាការឯកសារបណ្ណសារ ក៏ដូចជាការងារពាក់ព័ន្ធនឹងជនរងគ្រោះនៃរបបខ្មែរក្រហម ជនរងគ្រោះជាដើមបណ្តឹងរដ្ឋ ប្បវេណីជាដើម»។

ជាមួយគ្នានេះដែរ ឯកឧត្តមរដ្ឋលេខាធិការ និងជាប្រធានការិយាល័យរដ្ឋបាលស្តីទី នៃ សាលាក្តីខ្មែរក្រហមបានគូសបញ្ជាក់ថា សាលាក្តីខ្មែរក្រហមសង្ឃឹមថា រដ្ឋាភិបាលអាល្លឺម៉ង់នឹងចូលរួម ក្នុ ងកិច្ចការនេះបន្តទៀត ជាពិសេសពាក់ព័ន្ធនឹងការចូលរួមរបស់ជនរងគ្រោះ៕​​ ដោយ៖ គង់ ឌិន