យោធារបស់អ៊ីស្រាអែល បានបញ្ជាក់កាលពីថ្ងៃអង្គារថា ខ្លួនបានសម្លាប់ជនជាតិប៉ាឡេស្ទីន ដែលបានគប់ដុំថ្ម នៅតំបន់វេសបែង( West Bank) ជាកន្លែងដែលអាជ្ញាធរ បាននិយាយថា ជនរងគ្រោះដែលត្រូវបានសម្លាប់នោះ មានអាយុ ១៤ឆ្នាំ។

នៅក្នុងសេចក្តីថ្លែងការណ៍មួយកាលពីថ្ងៃចន្ទ អាជ្ញាធរប៉ាឡេស្ទីន បានប្រកាសអំពី«ការស្លាប់របស់ក្មេងប្រុសអាយុ ១៤ឆ្នាំ ឈ្មោះ Yousef Fouad F aqha ដែលត្រូវបានបាញ់ដោយកងកម្លាំងអ៊ីស្រាអែល នៅទីក្រុង Sinjil» នៅក្នុងតំបន់វេសបែងភាគកណ្តាល។

សេចក្តីថ្លែងការណ៍របស់សាលាក្រុងក្នុងតំបន់ ក៏បានបញ្ជាក់ថា ក្មេងជំទង់ Faqha បានស្លាប់ បន្ទាប់ពីត្រូវបានបាញ់ដោយកងកម្លាំងអ៊ីស្រាអែល។

នៅពេលសួរអំពីឧបទ្ទវហេតុនេះ យោធាអ៊ីស្រាអែលបានប្រាប់សារព័ត៌មាន AFP កាលពីថ្ងៃអង្គារថា ក្នុងអំឡុងប្រតិបត្តិការជុំវិញទីក្រុង Sinjil មួយថ្ងៃមុននេះ កងកម្លាំងរបស់ខ្លួនបាន «កំណត់អត្តសញ្ញាណភេរវករដែលបានគប់ដុំថ្មឆ្ពោះទៅផ្លូវដឹកជញ្ជូនមួយ ហើយបានគប់ដបពីរដែលមានសារធាតុគ្រោះថ្នាក់ ទៅកាន់កងកម្លាំង»។