បេសកជនប្រចាំនៅអ៊ុយក្រែនរបស់ប្រធានាធិបតីអាមេរិក លោក Donald Trump បាននិយាយថា ហានិភ័យនៃការមានភាពតានតឹងកាន់តែខ្លាំងទៅៗ ក្នុងសង្រ្គាម នៅអ៊ុយក្រែន «កំពុងកើនឡើងយ៉ាងឆាប់រហ័ស» បន្ទាប់ពីកងកម្លាំងអ៊ុយក្រែន បានប្រើប្រាស់យានដ្រូនវាយប្រហារយន្តហោះទម្លាក់គ្រាប់បែកដែលមានសមត្ថភាពបំពាក់អាវុធនុយក្លេអ៊ែរ នៅឯមូលដ្ឋានទ័ពអាកាសជាច្រើន ដែលមានទីតាំងនៅយ៉ាងជ្រៅក្នុងដែនដីរុស្ស៊ី។

គួរដឹងថា អ៊ុយក្រែនបានប្រាប់ថា ខ្លួនបានវាយប្រហារលើអាកាសយានដ្ឋាន នៅតំបន់ស៊ីបេរី និងចុងភាគខាងជើងរបស់រុស្ស៊ី កាលពីចុងសប្តាហ៍ ដោយវាយលុកគោលដៅចម្ងាយរហូតដល់ទៅ ៤.៣០០គីឡូម៉ែត្រ ពីសមរភូមិជួរមុខនៃតំបន់មានជម្លោះ។

បេសកជនរបស់លោក Trump គឺលោក Keith Kellogg បានប្រាប់ប្រព័ន្ធផ្សព្វផ្សាយ Fox News ថា៖ «ខ្ញុំកំពុងប្រាប់អ្នកថា កម្រិតហានិភ័យ កំពុងកើនឡើងយ៉ាងឆាប់រហ័ស ពោលគឺខ្ញុំមានន័យសំដៅដល់អ្វីដែលបានកើតឡើងកាលពីចុងសប្តាហ៍»។

លោកបានបន្ថែមថា៖ «គ្រប់គ្នាត្រូវតែដឹងថា ផ្នែកសន្តិសុខជាតិ នៅពេលដែលអ្នកវាយប្រហារប្រព័ន្ធការពារជាតិគូអរិ ជាពិសេសប្រព័ន្ធនុយក្លេអ៊ែរ Triad របស់ពួកគេ នោះមានន័យថា កម្រិតហានិភ័យរបស់អ្នក កើនឡើងយ៉ាងឆាប់រហ័ស ដោយសារតែអ្នកមិនអាចដឹងបានទេនូវអ្វីដែលភាគីម្ខាងទៀត នឹងធ្វើអ្វីនោះ។ ប្រាកដណាស់ អ្នកនឹងមិនដឹងទេ»។

រុស្ស៊ី និងសហរដ្ឋអាមេរិក រួមគ្នាមានប្រហែល ៨៨ភាគរយនៃអាវុធនុយក្លេអ៊ែរទាំងអស់។ មហាអំណាចនីមួយៗមានវិធីសំខាន់ៗចំនួន ៣ ដើម្បីវាយប្រហារដោយក្បាលគ្រាប់នុយក្លេអ៊ែរ ដែលគេស្គាល់ថា ប្រព័ន្ធនុយក្លេអ៊ែរ Triad មានដូចជាយន្តហោះទម្លាក់គ្រាប់បែកយុទ្ធសាស្ត្រ មីស៊ីលបាលីស្ទិកអន្តរទ្វីបបាញ់ពីដី និងមីស៊ីលបាលីស្ទិកបាញ់ចេញពីនាវាមុជទឹក។

លោក Kellogg បានបញ្ជាក់បន្ថែមថា ការខូចខាតយន្តហោះទម្លាក់គ្រាប់បែករុស្ស៊ី កាលពីចុងសប្តាហ៍ គឺមិនសូវសំខាន់ជាងផលប៉ះពាល់ផ្លូវចិត្តលើរុស្ស៊ីឡើយ ហើយថា លោកមានក្ដីបារម្ភជាពិសេស ចំពោះរបាយការណ៍មិនផ្លូវការ អំពីការវាយប្រហាររបស់អ៊ុយក្រែនលើមូលដ្ឋានទ័ពជើងទឹក នៅភាគខាងជើងនៃប្រទេសរុស្ស៊ី៕