លោកប្រធានាធិបតី Alexander Lukashenko បាននិយាយថា ប្រទេសបេឡារុស និងចិន កំពុងប្រឈមនឹងយុទ្ធនាការដាក់សម្ពាធពីលោកខាងលិច ខណៈដែលលោកបានជួបជាមួយមេដឹកនាំចិន លោក Xi Jinping ក្នុងទីក្រុងប៉េកាំង នៅថ្ងៃពុធ (ទី៤ ខែមិថុនា) នេះ។

បើយោងតាមទីភ្នាក់ងារសារព័ត៌មានរដ្ឋបេឡារុស Belta បានឲ្យដឹងថា លោក Lukashenko បានប្រាប់សមភាគីចិនរបស់លោកថា ប្រជាជាតិរបស់ពួកលោក ត្រូវប្រឈមជាមួយ «សម្ពាធដែលមិនធ្លាប់មានពីមុនមក» ពីលោកខាងលិច។ ហើយលោក Lukashenko បានបញ្ជាក់បន្ថែមថា៖ «ប្រទេសចិននឹងមិនអនុញ្ញាតឲ្យខូចសណ្តាប់ធ្នាប់ពិភពលោកទេ។ ប្រទេសជាច្រើន ជឿជាក់លើរឿងនេះ»។

មេដឹកនាំបេឡារុសដែលកាលពីខែមករា បានឈ្នះអាណត្តិទី៧ ជាប់ៗគ្នា បន្ទាប់ពីមាននូវការបោះឆ្នោតដែលត្រូវបានរិះគន់យ៉ាងទូលំទូលាយនោះ បានគ្រប់គ្រងអតីតប្រទេសសហភាពសូវៀតបេឡារុសអស់រយៈពេលជាង ៣០ឆ្នាំ។ លោកកំពុងស្ថិតនៅប្រទេសចិន សម្រាប់ទស្សនកិច្ចផ្លូវរដ្ឋរយៈពេល ៣ថ្ងៃ ក្នុងសប្តាហ៍នេះ បន្ទាប់ពីបានធ្វើដំណើរទៅកាន់ទីក្រុងប៉េកាំងលើកចុងក្រោយក្នុងខែធ្នូ ឆ្នាំ២០២៣។

យោងតាមទូរទស្សន៍រដ្ឋ CCTV លោក Xi បានប្រាប់លោក Lukashenko ថា ប្រទេសចិន តែងតែ «គិតដល់ និងអភិវឌ្ឍទំនាក់ទំនងរបស់ខ្លួនជាមួយបេឡារុស តាមរយៈទស្សនៈយុទ្ធសាស្ត្រ និងរយៈពេលវែង»។ ប្រព័ន្ធផ្សព្វផ្សាយ CCTV បានឲ្យដឹងទៀតថា ប្រទេសចិនមានឆន្ទៈក្នុងការធ្វើការជាមួយបេឡារុស ដើម្បីលើកកម្ពស់ទំនាក់ទំនងទ្វេភាគីដ៏ស្ថិរភាព និងទូលំទូលាយ ព្រមទាំងកិច្ចសហប្រតិបត្តិការដែលមានផលប្រយោជន៍ឲ្យគ្នាទៅវិញទៅមក៕