ប្រធានាធិបតីអាមេរិក លោក Donald Trump កាលពីថ្ងៃពុធ (០៤ មិថុនា) បានហៅប្រធានាធិបតីចិន លោក Xi Jinping ថាជាមេដឹកនាំប្រកាន់ជំហរតឹងរ៉ឹង និង "ពិបាកក្នុងការជំរុញឱ្យមានកិច្ចព្រមព្រៀង" ដោយបង្ហាញពីភាពរកាំរកូសបន្ថែម បន្ទាប់ពីសេតវិមាន បានលើកឡើងពីការរំពឹងទុកសម្រាប់ជំនួបតាមទូរសព្ទដែលរង់ចាំជាយូរមកហើយ រវាងមេដឹកនាំទាំងពីរក្នុងសប្តាហ៍នេះ។

លោក Trump បាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមថា "រូបលោកចូលចិត្តលោកប្រធានាធិបតី Xi នៃប្រទេសចិនខ្លាំងណាស់ ធ្លាប់ចូលចិត្ត ហើយក៏នឹងតែងតែចូលចិត្តដែរ ប៉ុន្តែលោក Xi ប្រកាន់ជំហរតឹងរ៉ឹងខ្លាំងពេក និងពិបាកក្នុងការធ្វើកិច្ចព្រមព្រៀងជាមួយណាស់"។

អ្នកនាំពាក្យសេតវិមាន លោកស្រី Karoline Leavitt បាននិយាយកាលពីថ្ងៃចន្ទថា លោក Trump ទំនងជានឹងពិភាក្សាតាមទូរសព្ទជាមួយលោក Xi ក្នុងសប្តាហ៍នេះ ដើម្បីលុបបំបាត់ការខ្វែងគំនិតគ្នាលើកិច្ចព្រមព្រៀងពន្ធកាលពីខែមុន នៅទីក្រុងហ្សឺណែវ រួមទាំងការដោះស្រាយរឿសារធាតុរ៉ែសំខាន់ៗផងដែរ។ ប៉ុន្តែសារបង្ហោះនៅព្រឹកព្រលឹមរបស់លោក Trump នៅលើ Truth Social នេះ ហាក់ពុំមែនជារឿងល្អសម្រាប់ការដោះស្រាយយ៉ាងឆាប់រហ័សនៃការខ្វែងគំនិតរបស់ភាគីទាំងពីរនោះទេ។

លោកស្រី Leavit គឺជាមន្រ្តីជំនិតជាន់ខ្ពស់របស់លោក Trump ទី៣ហើយដែលបានព្យាករពីជំនួបតាមទូរសព្ទនាពេលខាងមុខ រវាងមេដឹកនាំនៃប្រទេសមានសេដ្ឋកិច្ចពិភពលោកដ៏ធំបំផុតទាំងពីរ ប៉ុន្តែលោក Xi ហាក់បានបង្ហាញថាពិបាកនឹងចូលរួមកិច្ចសន្ទនា។ ប្រទេសចិន បាននិយាយកាលពីខែមេសាថា មេដឹកនាំទាំងពីរមិនមានការសន្ទនាជាមួយគ្នានោះទេនាពេលថ្មីៗនេះ៕