និស្សិតនៅប្រទេសគុយបា បានចេញតវ៉ាកាលពីថ្ងៃពុធ សម្រាប់សម្បទានបន្ថែមទៀតដើម្បីកាត់បន្ថយការដំឡើងពន្ធលើទិន្នន័យអ៊ីនធឺណិត ដោយនិយាយថាការសម្រេចចិត្តកាលពីថ្ងៃចន្ទ ក្នុងការផ្តល់ឱ្យពួកគេនូវដំណើរការបញ្ចុះតម្លៃ នៅតែមិនទាន់គ្រប់គ្រាន់នៅឡើយ។

និស្សិត នៃមហាវិទ្យាល័យយ៉ាងហោចណាស់មួយ នៅសាកលវិទ្យាល័យទីក្រុងឡាហាវ៉ាន ជាសាកលវិទ្យាល័យធំបំផុតរបស់ប្រទេស បានអំពាវនាវឱ្យមិត្តរួមថ្នាក់របស់ពួកគេកុំចូលរៀន ដើម្បីតវ៉ាចំពោះការឡើងថ្លៃ ដែលត្រូវបានស្តីបន្ទោសនៅទូទាំងប្រទេសកោះតំបន់ការ៉ាអ៊ីប មួយនេះ។

សារព័ត៌មាន Reuters បាននិយាយទៅកាន់និស្សិតមួយចំនួននៅខាងក្រៅសាកលវិទ្យាល័យ កាលពីថ្ងៃពុធ ដែលបានបញ្ជាក់ពីការអំពាវនាវឱ្យធ្វើពហិការថ្នាក់រៀន នៅមហាវិទ្យាល័យមួយចំនួន។

ពួកគេបាននិយាយថា ស្ថានភាពនៅតែតានតឹងនៅក្នុងបរិវេណសាលា ហើយបញ្ហានៅមិនទាន់ត្រូវបានដោះស្រាយ ទោះបីជាមានសម្បទានមួយចំនួនកាលពីថ្ងៃចន្ទពីក្រុមហ៊ុនទូរគមនាគមន៍គ្រប់គ្រងដោយរដ្ឋ គឺក្រុមហ៊ុនEtecsa ដែលផ្តល់ការបញ្ចុះតម្លៃផែនការទិន្នន័យ សម្រាប់និស្សិតសាកលវិទ្យាល័យ ក៏ដោយ។