យោងតាមប្រតិបត្តិករ ក្រុមហ៊ុន Zodiac Maritime បាននិយាយកាលពីថ្ងៃពុធថា នាវិក នៃនាវាដឹកទំនិញដែលផ្ទុករថយន្តប្រហែល៣.០០០គ្រឿង រួមមានទាំងរថយន្តអគ្គិសនីចំនួន៨០០ គ្រឿង ត្រូវបានបោះបង់ចោលនៅឆ្នេរសមុទ្រនៃរដ្ឋអាឡាស្កា បន្ទាប់ពីអគ្គិភ័យបានឆាបឆេះនៅលើនាវា។ ក្រុមហ៊ុន Zodiac បាននិយាយថាសមាជិកនាវិក២២នាក់ ត្រូវបានជម្លៀសខ្លួនចេញដោយសុវត្ថិភាពពីនាវា បន្ទាប់ពីពួកគេបរាជ័យក្នុងការពន្លត់អណ្តាតភ្លើងឆាបឆេះ។

ពួកគេត្រូវបានជម្លៀសចេញតាមទូកសង្គ្រោះ ហើយកំពុងត្រូវបានផ្ទេរទៅកាន់នាវាពាណិជ្ជកម្មមួយដែលនៅក្បែរនោះ ស្របពេលដែលមានឆ្មាំល្បាតឆ្នេររបស់អាមេរិក។ ឆ្មាំល្បាតឆ្នេរបាននិយាយនៅលើគណនីបណ្តាញ X របស់ខ្លួនថា នាវា Morning Midas ស្ថិតនៅចម្ងាយ៤៨២ គីឡូម៉ែត្រ ភាគនិរតីទីក្រុង Adak នៃរដ្ឋ Alaska ។

នាវាបំពាក់ទង់ជាតិប្រទេសលីបេរីយ៉ា បានចាកចេញពីកំពង់ផែ Yantai របស់ប្រទេសចិន កាលពីថ្ងៃទី២៦ ខែឧសភា ហើយកំពុងធ្វើដំណើរទៅកាន់ទីក្រុង Lazaro Cardenas ប្រទេសម៉ិកស៊ិក។

ក្រុមហ៊ុនបាននិយាយថា ដំបូងឡើយ ផ្សែងត្រូវបានមើលឃើញហុយចេញពីជាន់នាវាផ្ទុករថយន្តអគ្គិសនី(EVs)។ ប៉ុន្តែ គេពុំដឹងថារថយន្តម៉ាកអ្វីដែលនាវានេះ ផ្ទុកនោះទេ។

អគ្គិភ័យទាក់ទងនឹងរថយន្តអគ្គិសនីនៅលើនាវា ពិបាកក្នុងការពន្លត់ដោយសារតែកម្តៅដែលកើតឡើង និងហានិភ័យនៃការឆាបឆេះជាថ្មី ដែលអាចបន្តកើតមានច្រើនថ្ងៃ។