នាព្រឹកថ្ងៃទី៥ ខែមិថុនា ឆ្នាំ២០២៥នេះ ទីសី្តការក្រសួងវប្បធម៌ និងវិចិត្រសិល្បៈ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានទទួលជួបឯកឧត្តម Ricardo Estanislao Morote Cannales ឯកអគ្គរដ្ឋទូត នៃសាធារណរដ្ឋប៉េរូ ប្រចាំព្រះរាជាណាចក្រកម្ពុជា ដែលមាននិវេសនដ្ឋាននៅទីក្រុងកូឡាឡាំពួរ ប្រទេសម៉ាឡេស៊ី ដើម្បីសម្តែងការគួរសម និងពិភាក្សាការងារ។

ក្នុងជំនួបពិភាក្សាភាគីទាំងពីរ បានពិនិត្យទៅលើលទ្ធភាពផ្សេងៗ ក្នុងការជម្រុញកិច្ចសហប្រតិបតិ្តការលើវិស័យវប្បធម៌ ទេសចរណ៍រវាងប្រទេសកម្ពុជា និងប៉េរូ ។ ដូចយើងដឹងស្រាប់ហើយថា សាធារណរដ្ឋប៉េរូ មានទីតាំងឆ្ងាយពីប្រទេសកម្ពុជា។ កម្ពុជា ស្ថិតក្នុងទ្វីបអាស៊ី ចំណែក ប៉េរូ ស្ថិតក្នុងទី្វបអាមេរិកខាងត្បូង ប៉ុន្តែទោះបីជាយ៉ាងណាក៏ដោយ ការជម្រុញកិច្ចសហប្រតិបត្តិការក្នុងក្របខណ្ឌជាអន្តរជាតិ ត្រូវតែរិះរកវិធីណា ដើម្បីធ្វើការជាមួយគ្នា ទំនាក់ទំនងលើវិស័យវប្បធម៌ ក៏ដូចជាការផ្សព្វផ្សាយទេសចរណ៍ វប្បធម៌ផងដែរ។

ចាប់ផ្តើមពីចំនុចនេះ លោកជំទាវបណ្ឌិតសភាចារ្យ ភឿង សកុណា និងឯកឧត្តម Ricardo Estanislao Morote Cannales និងសិក្សារៀបចំឲ្យមានជាអនុស្សារណៈ នៃការយោគយល់គ្នាលើវិស័យវប្បធម៌ រវាងប្រទេសទាំងពីរ កម្ពុជា-ប៉េរូ។ ឈានចេញពីចំនុចនេះ ភាគីទាំងពីរ និងសិក្សារៀបចំជាខួបទំនាក់ទំនងការទូតរវាងប្រទេសទាំងពីរ ក្នុងនោះក៏រៀបចំពិព័រណ៌រូបថត និងសម្ភារៈផ្សេងៗលើវិស័យវប្បធម៌។

សូមរំលេចផងដែរថា ទឹកដីប៉េរូ គឺជាទីកំណើតនៃវប្បធម៌ជាច្រើនកាលពីសម័យបុរាណ និងមជ្ឈិមសម័យ ហើយមានប្រវត្តិអរិយធម៌ដ៏ចំណាស់បំផុតមួយអាយុកាលតាំងពីសហស្សវត្សរ៍ទី១០ មុនគ.ស.៕ អត្ថបទ រដ្ឋា