ខណៈដែលលោកប្រធានាធិបតីរុស្ស៊ី Vladimir Putin សន្យាសងសឹកអ៊ុយក្រែន ចំពោះការវាយប្រហារដោយយានដ្រូនដ៏ធំកាលពីចុងសប្តាហ៍មុន ទីប្រឹក្សាវិមានក្រឹមឡាំង និងឥស្សរជនជុំវិញខ្លួនលោក Donald Trump បានប្រាប់ប្រធានាធិបតីអាមេរិករូបនេះថា ហានិភ័យនៃការប្រឈមមុខដាក់គ្នាដោយនុយក្លេអ៊ែរ កំពុងតែកើនឡើងយ៉ាងគ្រោះថ្នាក់ នៅក្នុងការប៉ុនប៉ងដាក់សម្ពាធឱ្យលោកកាត់បន្ថយការគាំទ្ររបស់សហរដ្ឋអាមេរិក សម្រាប់អ៊ុយក្រែន។

លោក Kirill Dmitriev ប្រធានមូលនិធិទ្រព្យសម្បត្តិអធិបតេយ្យរបស់រុស្ស៊ី និងជាអន្តរការីដ៏សំខាន់រវាងវិមានក្រឹមឡាំង និងបេសកជនរបស់លោក Trump គឺលោក Steve Witkoff បានហៅការវាយប្រហារយានដ្រូនរបស់អ៊ុយក្រែន ថាជាការវាយលុកលើ "ទ្រព្យសម្បត្តិនុយក្លេអ៊ែររបស់រុស្ស៊ី" និងបានជំរុញបន្ថែមពីលើការភ័យខ្លាចពីលទ្ធភាពនៃសង្គ្រាមលោកលើកទីបី។

អ៊ុយក្រែន បានបោះបង់អាវុធនុយក្លេអ៊ែរដោយស្ម័គ្រចិត្តក្នុងឆ្នាំ១៩៩៤ ជាថ្នូរនឹងការធានាសន្តិសុខពីអាមេរិក អង់គ្លេស និងរុស្ស៊ី។ អ្នកដែលមានមន្ទិលសង្ស័យចំពោះការគាំទ្ររបស់សហរដ្ឋអាមេរិកសម្រាប់អ៊ុយក្រែន កំពុងចាប់យកហានិភ័យនៃការប្រឈមមុខដាក់គ្នានុយក្លេអ៊ែរនេះ ដើម្បីជជែកវែកញែកថា ជម្លោះអាចធ្លាក់ចេញពីការគ្រប់គ្រង។

ទីប្រឹក្សាកណ្តាលនិយមជាច្រើននៅក្នុងរដ្ឋបាលផ្ទៃក្នុងរបស់លោក Trump - រួមទាំងអ្នកដែលមានទំនាក់ទំនងជិតស្និទ្ធជាមួយអ៊ុយក្រែន - ក៏ព្រមានថា ហានិភ័យនៃជម្លោះនុយក្លេអ៊ែរ កំពុងកើនឡើង នៅពេលដែលពួកគេខ្នះខ្នែងរក្សាចំណាប់អារម្មណ៍របស់លោក Trump ក្នុងការស្វែងរកសន្តិភាព ខណៈមេដឹកនាំអាមេរិករូបនេះ កាន់តែអស់ភាពអត់ធ្មត់ក្នុងកិច្ចចរចាបញ្ចប់សង្រ្គាមអ៊ុយក្រែន៕