កងកម្លាំងអ៊ីស្រាអែល បានចាប់ខ្លួនជនជាតិប៉ាឡេស្ទីន ២៤នាក់ នៅទូទាំងតំបន់វេសបែង (West Bank) ក្នុងរយៈពេល ២៤ម៉ោង ចុងក្រោយនេះ នៅក្នុងរលកនៃការវាយឆ្មក់មួយ ដោយកំណត់គោលដៅទៅលើក្រុមជនសកម្មប្រយុទ្ធ និងក្រុមជួញដូរអាវុធដែលត្រូវបានសង្ស័យ។

នៅក្នុងសេចក្តីថ្លែងការណ៍រួម កងកម្លាំងការពារអ៊ីស្រាអែល ទីភ្នាក់ងារសន្តិសុខផ្ទៃក្នុង Shin Bet និងនគរបាលអ៊ីស្រាអែល បាននិយាយថា ជនសង្ស័យចំនួន ៩នាក់ ត្រូវបានចាប់ខ្លួន នៅពេលយប់ ក្នុងអំឡុងពេលប្រតិបត្តិការ នៅក្នុងទីក្រុង Tamun ភាគខាងជើង និងជំរំជនភៀសខ្លួន Far'a ក្បែរនោះ។ ក្នុងចំណោមអ្នកដែលត្រូវបានឃាត់ខ្លួនទាំងនោះ មានបុគ្គលមួយចំនួនដែលត្រូវបានពិពណ៌នាថា ជាអ្នកជួញដូរអាវុធសំខាន់ៗ រួមទាំងម្នាក់ដែលត្រូវបានចោទប្រកាន់ថា បានផ្គត់ផ្គង់អាវុធដែលប្រើក្នុងការវាយប្រហារដ៏សាហាវកាលពីខែមុន ដែលបានសម្លាប់ទាហានអ៊ីស្រាអែលម្នាក់ នៅប៉ុស្តិ៍ត្រួតពិនិត្យមួយ។

សេចក្តីថ្លែងការណ៍បានបញ្ជាក់ថា កាំភ្លើង M-16 ចំនួនមួយដើម និងអាវុធផ្សេងទៀត ត្រូវបានរឹបអូស ក្នុងអំឡុងពេលការវាយឆ្មក់ពេញមួយយប់។

ក្នុងប្រតិបត្តិការដាច់ដោយឡែកនៅទូទាំងដែនដីនេះ ជនសង្ស័យ ១៥នាក់ផ្សេងទៀត ត្រូវបានចាប់ខ្លួន និងរឹបអូសអាវុធ ៧ដើម បន្ថែមទៀត។ អ្នកជាប់ឃុំទាំងអស់ និងអាវុធដែលរឹបអូសបាន ត្រូវបានប្រគល់ទៅឲ្យទីភ្នាក់ងារសន្តិសុខ Shin Bet និងនគរបាល ដើម្បីធ្វើការស៊ើបអង្កេតបន្ថែម។

អំពើហិង្សានៅតំបន់វេសបែង បានកើនឡើង ចាប់តាំងពីការចាប់ផ្តើមនៃសង្រ្គាមហ្កាហ្សា នៅថ្ងៃទី ០៧ ខែតុលា ឆ្នាំ ២០២៣។ យោធាអ៊ីស្រាអែល បានបង្កើនប្រតិបត្តិការ ជាពិសេសនៅភាគខាងជើង ចំពេលមានការកើនឡើងនៃការវាយប្រហាររបស់អ្នកតាំងលំនៅ និងការប៉ះទង្គិចគ្នាជារៀងរាល់ថ្ងៃ ជាមួយក្រុមប្រឆាំងប៉ាឡេស្ទីន។

យោងតាមអង្គការមនុស្សធម៌អន្តរជាតិបានឲ្យដឹងថា ប្រជាជនប៉ាឡេស្ទីនប្រហែល ១.000នាក់ ត្រូវបានសម្លាប់ នៅតំបន់វេសបែង ចាប់តាំងពីជម្លោះនៅតំបន់ហ្កាហ្សា បានផ្ទុះឡើង។