អតីតនាយករដ្ឋមន្ត្រីនៃប្រទេសស៊ូដង់កាលពីថ្ងៃពុធ បានច្រានចោលការសម្រេចរបស់យោធា ដើម្បីបង្កើត រដ្ឋាភិបាលថ្មីថា ជា «ការធ្វើឲ្យល្អមើល»ប៉ុណ្ណោះ ដោយនិយាយថា ជ័យជម្នះនាពេលថ្មីៗនេះរបស់ខ្លួន ក្នុងការដណ្តើមបានរដ្ឋធានីខាទុំ (Khartoum) និងទឹកដីផ្សេងទៀតមកគ្រប់គ្រង នឹងមិនបញ្ចប់សង្គ្រាមស៊ីវិលរយៈពេលពីរឆ្នាំ នៅក្នុងប្រទេសនេះទេ។

លោក Abdalla Hamdok បាននិយាយថា គ្មានជ័យជម្នះយោធានៅក្នុងទីក្រុងខាទុំ ឬកន្លែងផ្សេងទៀតអាចបញ្ចប់សង្រ្គាម ដែលបានសម្លាប់មនុស្សរាប់ម៉ឺននាក់ និងបានបណ្តេញមនុស្សរាប់លាននាក់ ចេញពីផ្ទះសម្បែងរបស់ពួកគេ បានទេ។

លោក Hamdok បាននិយាយនៅខាងក្រៅសន្និសីទអភិបាលកិច្ចរបស់មូលនិធិ Mo Ibrahim ក្នុងប្រទេសម៉ារ៉ុកថា «ទោះបីទីក្រុងខាទុំ ត្រូវបានកាន់កាប់ ឬមិនត្រូវបានកាន់កាប់ វាជារឿងដែលមិនពាក់ព័ន្ធគ្នាទេ។

«ពុំមានដំណោះស្រាយយោធាណាមួយអាចបញ្ចប់សង្គ្រាមនេះបានទេ ហើយក៏គ្មានភាគីណាមួយ អាចទទួលបានជ័យជម្នះទាំងស្រុងនោះដែរ»។

លោក Hamdok បានក្លាយជានាយករដ្ឋមន្ត្រីស៊ីវិលដំបូងគេរបស់ប្រទេសស៊ូដង់ បន្ទាប់ពីការគ្រប់គ្រងដោយយោធាជាច្រើនទសវត្សរ៍ ក្នុងឆ្នាំ ២០១៩ ដោយព្យាយាមដឹកនាំការផ្លាស់ប្តូរតាមបែបប្រជាធិបតេយ្យ។ លោកបានលាលែងពីតំណែង នៅខែមករា ឆ្នាំ ២០២២ បន្ទាប់ពីមានភាពច្របូកច្របល់ដែលលោក ត្រូវបានបណ្តេញចេញពីតំណែង ដោយសាររដ្ឋប្រហារ ហើយបានកាន់តំណែងឡើងវិញ មួយរយៈពេលខ្លី ចំពេលមានសម្ពាធពីអន្តរជាតិ។