អ្នកនាំពាក្យអង្គការសហប្រជាជាតិ បាននិយាយកាលពីថ្ងៃពុធថា ការភៀសខ្លួនដែលទាក់ទងទៅនឹងជម្លោះ និងការរាលដាលជំងឺអាសន្នរោគ បានបន្តកើនឡើងនូវតម្រូវការជំនួយមនុស្សធម៌នៅទូទាំងប្រទេសស៊ូដង់។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិលោក Antonio Guterres ដោយបានដកស្រង់តួលេខពីអង្គការទេសន្តប្រវេសន៍អន្តរជាតិ (IOM) បានឱ្យដឹងថា មនុស្សជិត៩.៧០០នាក់នៅក្នុងរដ្ឋ Khartoum តែមួយ ថ្មីៗនេះបានភៀសខ្លួនចេញដោយសារតែជម្លោះ។

នៅរដ្ឋ South Kordofan មនុស្សជាង៩.០០០នាក់ បានភៀសខ្លួនចេញពីទីក្រុង Dibebat ក្នុងតំបន់ Al Quoz កាលពីសប្តាហ៍មុន ដោយសារតែការប៉ះទង្គិចគ្នាខ្លាំង។ លោកនិយាយថា ស្ថានភាពនៅតែមានការប្រែប្រួលខ្លាំង។ ក្នុងពេលជាមួយគ្នានេះ មនុស្សប្រហែល៦០០នាក់ បានភៀសខ្លួនចេញពីជំរំ Abu Shouk និងក្រុង El Fasher ក្នុងរដ្ឋ North Darfur កាលពីសប្តាហ៍មុន។

និយាយពីការផ្ទុះឡើងជំងឺអាសន្នរោគ អ្នកនាំពាក្យរូបនេះបាននិយាយថា ករណីប្រចាំថ្ងៃកំពុងកើនឡើងជាលំដាប់នៅក្នុងរដ្ឋ River Nile នៅភាគខាងជើង ទោះបីជាវាកំពុងធ្លាក់ចុះនៅក្នុងរដ្ឋ Khartoum ក៏ដោយ។ ក្នុងរយៈពេលពីរសប្តាហ៍កន្លងទៅនេះ អាជ្ញាធរសុខាភិបាលក្នុងរដ្ឋ River Nile បានរាយការណ៍ថាមានករណីកើនឡើងជាង១៨០ ករណី និងមានអ្នកស្លាប់ចំនួន៤នាក់។ 

លោកនិយាយថា ដៃគូមនុស្សធម៌ បានព្រមានថា ការភៀសខ្លួនដែលនៅបន្ត ហេដ្ឋារចនាសម្ព័ន្ធត្រូវបានបំផ្លាញ និងការទទួលបានទឹកស្អាតមានកម្រិត កំពុងបង្កើនល្បឿននៃការចម្លងមេរោគ។ ទន្ទឹមនឹងនេះ ប្រជាជនភៀសខ្លួនរាប់ពាន់នាក់ពេលនេះកំពុងត្រឡប់ទៅរដ្ឋ Blue Nile ហើយត្រូវការជំនួយជាបន្ទាន់។ លោកនិយាយថា ពួកគេខ្វះអាហារ ទឹកស្អាត ការថែទាំសុខភាព ទីជម្រក និងការសិក្សាអប់រំ។