​ជប៉ុន៖ នាយករដ្ឋមន្ត្រី​ជប៉ុនលោក Fumio Kishida បាន​និយាយ​កាលពី​ថ្ងៃ​អង្គា​រថា ប្រទេស​ជប៉ុននឹង​បន្ត​ដាក់​វិធានការ​រឹតត្បិត​តឹងរ៉ឹង​លើ​ការគ្រប់គ្រង​ព្រំដែន​របស់ខ្លួន​ឡើងវិញ ដែល​ហាមឃាត់អ្នក​ចូល​មកពី​បរទេស​ភាគច្រើន រហូតដល់​មាន​ព័ត៌មាន​បន្ថែមទៀតអំពី​វីរុសប​ម្លែ​ង​ខ្លួន​ថ្មី Omicron។

លោក Kishida បាន​និយាយថា​ លោក​នឹង​បង្កើន​តម្រូវការការដាក់​ឲ្យ​ធ្វើ​ច​ត្តា​ឡី​ស័ក សម្រាប់​អ្នកមាន​ទំនាក់ទំនង​ជិតស្និទ្ធ​ជាមួយអ្នកជំងឺ​ឆ្លងវីរុសប​ម្លែ​ង​ថ្មី Omicron ដោយ​ដាក់​ឲ្យ​នៅ​ដោយឡែក​រយៈពេល ១៤ថ្ងៃ​នៅ​ទីតាំង​កំណត់ដោយរដ្ឋាភិបាល ជំនួស​ឱ្យ​តម្រូវការ​ស្នាក់នៅ​ក្នុង​លំនៅឋាន​បច្ចុប្បន្ន​។ លោក​បាន​ថ្លែង​នៅក្នុងសន្និសីទ​សារព័ត៌មានពេល​បញ្ចប់​នៃ​សម័យប្រជុំ​សភា ដែល​បានអនុម័ត​ថវិកា​បន្ថែម ចំនួន ៣៦ពាន់​ពាន់​លាន​យ៉េន ឬ​ប្រមាណ ៣១៧ពាន់​លាន​ដុល្លារ​អាមេរិកដើម្បី​ផ្តល់មូលនិធិ​ដល់​វិធានការ​ទប់ស្កាត់​វីរុស COVID-19 និង​ស្តារ​សេដ្ឋកិច្ចដែល​រងគ្រោះ​ដោយជំងឺ​រាតត្បាត​ឡើងវិញ​។ បន្ទាប់ពី​ការបន្ធូរបន្ថយ​ការគ្រប់គ្រង​មួយរយៈ ប្រទេស​ជប៉ុន​បានដាក់​ឡើងវិញការ​គ្រប់គ្រង​ព្រំដែន​តឹងតែង​បំផុត​លើ​ពិភពលោក ​ក្នុងពេល​មានការ​កើនឡើងជា​សកល​នៃ​វីរុសប​ម្លែ​ង​ខ្លួន​ថ្មី Omicron។

លោក Kishida និយាយថា ​ការកើនឡើងនៃ​ការឆ្លង​វីរុស​ថ្មី Omicron នៅ​ក្នុង​សហរដ្ឋអាមេរិក​កំពុង​បណ្តាលឱ្យមាន​ភាពមិន​ច្បាស់លាស់មួយចំនួន ​សម្រាប់​ក្តីសង្ឃឹម​របស់​លោក​ក្នុង​ការធ្វើ​ទស្សនកិច្ច​ទីក្រុង​វ៉ា​ស៊ី​ង​តោនក្នុងពេល​ឆាប់​នេះ សម្រាប់​កិច្ចពិភាក្សា​ផ្ទាល់​ជាមួយប្រធានាធិបតីលោក Joe Biden។ អ្នកវិទ្យាសាស្ត្រ​និយាយ​ថា ​វីរុស​ប​ម្លែ​ង​ថ្មី Omicron ឆ្លង​រាលដាល​កាន់តែ​ងាយស្រួល​ជាងវីរុស​ឆ្លង​ផ្សេងទៀត រួម​ទាំង​វីរុស​ប​ម្លែ​ង​ខ្លួន​ថ្មី Delta​។ ការសិក្សា​ដំបូង​បង្ហាញថា អ្នក​ដែលបាន​ចាក់​វ៉ាក់សាំង​នឹង​ត្រូវការ​ការចាក់​វ៉ាក់សាំង​ដូ​ស​ជំរុញ ជា​ឱកាសល្អ​បំផុត​ក្នុងការ​ការពារវីរុស​ថ្មី Omicron ប៉ុន្តែ​ទោះបីជា​គ្មាន​វ៉ាក់សាំង​ដូ​ស​ជំរុញ ការចាក់​វ៉ាក់សាំង​ពេញលេញនៅតែ​ផ្តល់​ការការពារ​រឹងមាំ​លើ​ជំងឺ​ធ្ងន់ធ្ងរ និង​ការ​ស្លាប់​បាន​៕

អត្ថបទ៖ ប៊ុនថន