សារព័ត៌មាន Asahi បានរាយការណ៍នៅថ្ងៃសុក្រនេះថា ប្រទេសជប៉ុន បានបន្ធូរបន្ថយការទាមទាររបស់ខ្លួនសម្រាប់ការលុបចោលទាំងស្រុងនូវការដំឡើងពន្ធលើយានយន្តចំនួន២៥ភាគរយរបស់សហរដ្ឋអាមេរិក ហើយជំនួសដោយការស្នើយន្តការដើម្បីកាត់បន្ថយអត្រាដែលផ្អែកលើចំនួនប្រទេសប៉ុន្មានដែលរួមចំណែកដល់ឧស្សាហកម្មរថយន្តរបស់សហរដ្ឋអាមេរិក។

ប្រធានអ្នកចរចារការដំឡើងពន្ធរបស់ប្រទេសជប៉ុន លោក Ryosei Akazawa កំពុងស្ថិតនៅក្នុងទីក្រុងវ៉ាស៊ីនតោន ដើម្បីជួបចរចាជុំទី៥ជាមួយមន្ត្រីសហរដ្ឋអាមេរិក រួមមានទាំងរដ្ឋមន្ត្រីក្រសួងរតនាគារ លោក Scott Bessent និងរដ្ឋមន្ត្រីក្រសួងពាណិជ្ជកម្ម លោក Howard Lutnick ផងដែរ។

សារព័ត៌មានAsahi បាននិយាយថា នៅក្រោមសំណើចុងក្រោយរបស់ប្រទេសជប៉ុន ឲ្យទីក្រុងវ៉ាស៊ីនតោនកាត់បន្ថយការដំឡើងពន្ធលើយានយន្តដោយផ្អែកលើកត្តាមួយចំនួនដូចជាចំនួនរថយន្តដែលក្រុមហ៊ុនផលិតរថយន្តជប៉ុនផលិតនៅសហរដ្ឋអាមេរិក និងចំនួនរថយន្តដែលត្រូវបាននាំចេញពីទីនោះទៅកាន់ទីផ្សារផ្សេងៗទៀត។

សេចក្តីថ្លែងការណ៍និយាយថា ភាគីទាំងពីរ បានអះអាងជាថ្មីនូវជំហររៀងៗខ្លួនលើវិធានការដំឡើងពន្ធរបស់សហរដ្ឋអាមេរិក និងបានចូលរួមក្នុងការពិភាក្សាជាក់ស្តែងលើការពង្រីកពាណិជ្ជកម្ម ការដោះស្រាយវិធានការមិនមែនពន្ធ និងកិច្ចសហប្រតិបត្តិការលើសន្តិសុខសេដ្ឋកិច្ច។