ប្រមុខបញ្ជាការយោធាក្នុងតំបន់របស់សហរដ្ឋអាមេរិក បាននិយាយនៅថ្ងៃសុក្រ (០៦ មិថុនា) នេះថា សមយុទ្ធដឹកជញ្ជូននៅតំបន់អាស៊ីបូព៌ា នឹងធ្វើឡើងនៅរដូវក្តៅនេះដោយស្ថាប័នយោធាអាមេរិក ដែលទទួលបន្ទុកបម្លាស់ទីអាវុធ និងគ្រឿងយុទ្ធោបករណ៍ ហើយសកម្មភាពនេះនឹងជួយឱ្យខ្លួនអាចសម្របសម្រួល និងទំនាក់ទំនងជាមួយសម្ព័ន្ធមិត្ត កាន់តែប្រសើរឡើងក្នុងការឆ្លើយតបទៅនឹងវិបត្តិ។

បញ្ជាការដឹកជញ្ជូនរបស់សហរដ្ឋអាមេរិក ឬហៅថា TRANSCOM ទទួលខុសត្រូវមិនត្រឹមតែសម្រាប់ការសម្របសម្រួលទីតាំងជាមុននៃអាវុធ និងគ្រឿងយុទ្ធោបករណ៍ផ្សេងទៀតនៅជុំវិញពិភពលោកទាំងផ្លូវគោក ផ្លូវអាកាស និងផ្លូវសមុទ្រប៉ុណ្ណោះទេ ប៉ុន្តែថែមទាំងសម្រាប់ការផ្គត់ផ្គង់ឡើងវិញក្នុងករណីមានជម្លោះណាមួយផងដែរ។

ក្នុងដំណើរទស្សនកិច្ចទៅកាន់អាស៊ីបូព៌ា មេបញ្ជាការ TRASNCOM លោក Randall Reed បានប្រាប់អ្នកសារព័ត៌មានថា នេះជារឿងចាំបាច់ក្នុងការរក្សា និងពង្រីកទំនាក់ទំនងនៅក្នុងតំបន់ ដើម្បីធានាឱ្យមានការឆ្លើយតបយ៉ាងឆាប់រហ័សរបស់សហរដ្ឋអាមេរិក ចំពោះគ្រោះមហន្តរាយ និងទប់ទល់ការគំរាមកំហែងដល់សន្តិភាព និងសន្តិសុខ។

លោកបាននិយាយនៅសន្និសីទមួយថា "យោធាអាមេរិក នឹងធ្វើសមយុទ្ធជាបន្តបន្ទាប់ ហើយនឹងសាកល្បងស្ថាបត្យកម្មដឹកជញ្ជូន និងហេដ្ឋារចនាសម្ព័ន្ធបច្ចុប្បន្ន ដែលផ្តល់នូវសេរីភាពនៃការធ្វើសមយុទ្ធប្រកបដោយនិរន្តរភាព" ដោយមិនផ្តល់ព័ត៌មានលម្អិតអំពីទីតាំង ឬពេលវេលានៃសមយុទ្ធនេះទេ។ ក្នុងដំណើរទស្សនកិច្ចរបស់ខ្លួន លោក Reed បានទៅជប៉ុន និងហ្វីលីពីន ហើយនឹងទៅកូរ៉េខាងត្បូង ដែលជាសម្ព័ន្ធមិត្តសន្ធិសញ្ញាទាំងអស់របស់សហរដ្ឋអាមេរិក៕