អាជ្ញាធរសុខាភិបាលក្នុងខេត្តស៊ីឈួន (Sichuan) ភាគនិរតីនៃប្រទេសចិន កំពុងស្នើឱ្យមានកាបន្ថែមពេលទៅលើច្បាប់ឈប់សម្រាកអាពាហ៍ពិពាហ៍រហូតដល់ ២៥ថ្ងៃ និងការឈប់សម្រាកលំហែមាតុភាពរហូតដល់ ១៥០ថ្ងៃ ដើម្បីជួយបង្កើត "សង្គមងាយស្រួលក្នុងការមានកូន" ដែលជួយបង្កើនចំនួនប្រជាជនរបស់ប្រទេស។

ជំហាននេះកើតឡើងនៅពេលដែលរដ្ឋាភិបាលរបស់ប្រទេសចិន ពិបាកក្នុងការជំរុញអត្រាកំណើតនៅក្នុងមហាសេដ្ឋកិច្ចទីពីររបស់ពិភពលោក។ ចំនួនប្រជាជនរបស់ប្រទេសចិន បានធ្លាក់ចុះបីឆ្នាំជាប់គ្នាក្នុងឆ្នាំ២០២៤ ហើយអ្នកជំនាញបានព្រមានថា ការធ្លាក់ចុះនេះនឹងបន្តកាន់តែអាក្រក់ទៅៗ។

គណៈកម្មការសុខាភិបាលខេត្តស៊ីឈួន ដែលចេញផ្សាយសេចក្តីព្រាងនៅលើគេហទំព័ររបស់ខ្លួន កំពុងស្វះស្វែងរកមតិសាធារណៈ និងមតិយោបល់លើបញ្ហានេះ ពីថ្ងៃទី៣០ ខែឧសភា ដល់ថ្ងៃទី៣០ ខែមិថុនា។ ខេត្តស៊ីឈួន មានប្រជាជនចំនួន ៨៤លាននាក់ ច្រើនជាងប្រទេសភាគច្រើន រួមទាំងឲអាល្លឺម៉ង់ និងចក្រភពអង់គ្លេស។

សំណើនេះនឹងពង្រីកការឈប់សម្រាកអាពាហ៍ពិពាហ៍ចំនួន ៤០០% ពីរយៈពេល ៥ថ្ងៃដែលបានផ្តល់ឱ្យនាពេលបច្ចុប្បន្ន និងច្រើនជាងទ្វេដងនៃរយៈពេលឈប់សម្រាកលំហែមាតុភាពដែលមានស្រាប់ចំនួន ៦០ថ្ងៃ។ អាជ្ញាធរនិយាយថា ខេត្តស៊ីឈួន ក៏គ្រោងនឹងបន្ថែមថ្ងៃសម្រាកបិតុភាពដល់ ៣០ថ្ងៃ ពីរយៈពេល ២០ថ្ងៃបច្ចុប្បន្ន ដើម្បី "សម្រួលដល់បុរសក្នុងការមើលថែភរិយាក្រោយពេលសម្រាលកូន និងជួយគាំទ្រដល់ការចែករំលែកការទទួលខុសត្រូវរវាងគូស្វាមីភរិយា ក្នុងការចិញ្ចឹមកូន"៕