មន្ត្រីសេតវិមាន បាននិយាយកាលពីថ្ងៃសុក្រ ទី៦ ខែមករា ថា ប្រធានាធិបតីសហរដ្ឋអាមេរិក លោក Donald Trump មិនចាប់អារម្មណ៍ក្នុងការពិភាក្សាជាមួយ លោក Elon Musk ទេ ជាសញ្ញាបង្ហាញថាលោកប្រធានាធិបតី និងអតីតសម្ព័ន្ធមិត្តរបស់លោករូបនេះ ប្រហែលជាពុំអាចដោះស្រាយជម្លោះរបស់ខ្លួន ជុំវិញសេចក្តីស្នើច្បាប់កាត់បន្ថយពន្ធច្រើនហួស ក្នុងពេលណាមួយឆាប់ៗនោះទេ។

មន្ត្រីសេតវិមានម្នាក់ បាននិយាយថា គ្មានការសន្ទនាតាមទូរស័ព្ទរវាងលោក Trump និងនាយកប្រតិបត្តិក្រុមហ៊ុន Tesla ត្រូវបានគ្រោងទុកសម្រាប់ថ្ងៃនេះទេ ដែលកាលពីពេលមុននេះ មន្ត្រីសេតវិមានម្នាក់ផ្សេងទៀត បាននិយាយថា លោក Trump និងលោក Musk នឹងជួបសន្ទនាគ្នា។ នៅក្នុងបទសម្ភាសន៍ជាមួយប្រព័ន្ធផ្សព្វផ្សាយអាមេរិកមួយចំនួន លោក Trump បាននិយាយថា លោកផ្តោតសំខាន់ទៅលើបញ្ហាផ្សេងៗទៀត។ លោក Trump បានប្រាប់ប្រព័ន្ធផ្សព្វផ្សាយ CNN កាលពីថ្ងៃសុក្រថា «ខ្ញុំក៏លែងគិតពី លោក Elon Musk ទៀតដែរ។ គាត់មានបញ្ហាហើយ»។

មន្ត្រីដដែលបាននិយាយថា លោក Trump អាចនឹងលែងប្រើប្រាស់រថយន្ត Tesla Model S ពណ៌ក្រហម ដែលលោកបានទិញកាលពីខែមីនា បន្ទាប់ពីបង្ហាញរថយន្តអគ្គិសនីរបស់លោក Musk នៅលើវាលស្មៅនៅសេតវិមាន។ ចំណែកលោក Musk ពុំបាននិយាយទៅកាន់លោក Trump ដោយផ្ទាល់នោះទេ ប៉ុន្តែបានបន្តការរិះគន់របស់លោកចំពោះការកាត់បន្ថយពន្ធ និងសេចក្តីស្នើច្បាប់ចំណាយដ៏ច្រើន របស់ក្រុមសាធារណរដ្ឋ ដែលមានក្នុងរបៀបវារៈក្នុងស្រុកជាច្រើនរបស់លោក Trump ។

នៅលើវេទិកាបណ្តាញផ្សព្វផ្សាយសង្គម X លោកMusk បានបង្កើនការធ្វើអត្ថាធិប្បាយធ្វើឡើងដោយអ្នកផ្សេងទៀតដែលថា «សេចក្តីស្នើច្បាប់ចំណាយដ៏ច្រើន» របស់ លោក Trump នឹងធ្វើឱ្យប៉ះពាល់ដល់ក្រុមសាធារណរដ្ឋ និងបន្ថែមបំណុល៣៦,២សែនកោដ៍ដុល្លាររបស់ប្រទេស។