សេតវិមានបានឲ្យដឹងថា ប្រធានាធិបតីអាមេរិកលោក Donald Trump កាលពីថ្ងៃសុក្រ (ទី ៦ ខែមិថុនា) បានចុះហត្ថលេខាលើក្រឹត្យ ដើម្បីពង្រឹងសមត្ថភាពការពាររបស់សហរដ្ឋអាមេរិក ប្រឆាំងនឹងការគំរាមកំហែងដោយយានដ្រូន និងដើម្បីអភិវឌ្ឍយន្តហោះខ្នាតតូចប្រើថាមពលគ្គិសនី និងយន្តហោះពាណិជ្ជកម្មលឿនជាងសំឡេង។

នៅក្នុងក្រឹត្យចំនួន ៣ នេះ លោក Trump បានស្វែងរកការអនុញ្ញាតឲ្យប្រើប្រាស់យានដ្រូនជាប្រចាំហួសពីការមើលឃើញរបស់អ្នកបញ្ជា ដែលជាជំហានដ៏សំខាន់មួយក្នុងការអនុញ្ញាតឲ្យមានការចែកចាយយានដ្រូនពាណិជ្ជកម្ម និងកាត់បន្ថយការពឹងផ្អែករបស់សហរដ្ឋអាមេរិកលើក្រុមហ៊ុនយានដ្រូនរបស់ចិន ក៏ដូចជាការធ្វើតេស្តជាមុន សម្រាប់យន្តហោះដែលហោះហើរ និងចុះចតដោយមិនចាំបាច់មានផ្លូវរត់។

ក្រឹត្យនេះគួរតែជំរុញដល់ eVTOL (ក្រុមហ៊ុនយន្តហោះដែលហោះហើរ និងចុះចតមិនចាំបាច់មានផ្លូវរត់) ក្នុងនោះរួមមានទាំងក្រុមហ៊ុន Joby Aviation និង Archer Aviation ផងដែរ។ លោក Trump កំពុងបង្កើតក្រុមការងារសហព័ន្ធ ដើម្បីធានាថា សហរដ្ឋអាមេរិកគ្រប់គ្រងផ្ទៃមេឃរបស់អាមេរិក ពង្រីកការរឹតបន្តឹងលើទីតាំងរសើប ពង្រីកការប្រើប្រាស់បច្ចេកវិទ្យារបស់សហព័ន្ធ ដើម្បីស្វែងរកយានដ្រូនតាមពេលវេលាជាក់ស្តែង និងផ្តល់ជំនួយដល់ការអនុវត្តច្បាប់របស់រដ្ឋ និងក្នុងតំបន់។

ជាមួយគ្នានេះ នាយកការិយាល័យគោលនយោបាយវិទ្យាសាស្ត្រ និងបច្ចេកវិទ្យារបស់សេតវិមាន លោក Michael Kratsios បាននិយាយថា៖ «លោក Trump ក៏មានគោលបំណងដោះស្រាយការគំរាមកំហែងកាន់តែខ្លាំងឡើងៗពីឧក្រិដ្ឋកម្មរបស់ក្រុមភេរវករ និងការប្រើប្រាស់មិនត្រឹមត្រូវនៃយានដ្រូនបរទេស នៅក្នុងដែនអាកាសសហរដ្ឋអាមេរិក»៕