លោក Donald Trump បាននិយាយកាលពីថ្ងៃសៅរ៍៧ មិថុនាថាទំនាក់ទំនងរបស់លោកជាមួយម្ចាស់ជំនួយដ៏ធំរបស់លោកគឺ មហាសេដ្ឋីElon Musk បានចប់ហើយ និងបានព្រមានថានឹងមានផលវិបាកធ្ងន់ធ្ងរ ប្រសិនបើលោកMusk ងាកទៅផ្តល់មូលនិធិដល់គណបក្សប្រជាធិបតេយ្យរបស់សហរដ្ឋអាមេរិកដែលកំពុងឈរឈ្មោះប្រឆាំងនឹងគណបក្សសាធារណរដ្ឋ ដែលបោះឆ្នោតឱ្យប្រធានាធិបតីប្រមូលពន្ធនិង សេចក្ដីព្រាងច្បាប់ស្ដីពីការចំណាយរបស់រដ្ឋាភិបាល។ 

នៅក្នុងបទសម្ភាសន៍តាមទូរស័ព្ទជាមួយទូរទស្សន៍ NBC News លោក Trump បានបដិសេធមិននិយាយថាតើផលវិបាកទាំងនោះគឺជាអ្វីនោះទេ ហើយបានបន្ថែមថាលោកមិនទាន់មានការពិភាក្សាអំពីថាតើត្រូវស៊ើបអង្កេតលោក Musk ឬយ៉ាងណានោះទេ។

នៅពេលសួរថាតើរូបលោកគិតថាទំនាក់ទំនងរបស់លោកជាមួយម្ចាស់ក្រុមហ៊ុន Tesla និងSpaceX បានបញ្ចប់ឬយ៉ាងណានោះ លោកTrump បាននិយាយថា លោកនឹងសន្មតថាបញ្ចប់មែនហើយ ។

នៅពេលសួរថាតើលោកមានបំណងប្រាថ្នាចង់ផ្សះផ្សាទំនាក់ទំនងរបស់លោកជាមួយលោក Musk ដែរឬទេ លោក Trump និយាយថា អត់ទេ។លោកគ្មានចេតនានិយាយជាមួយលោក Musk នោះទេ។

ទោះយ៉ាងណាក៏ដោយ លោក Trump បាននិយាយថា លោកមិនបានគិតអំពីការបញ្ចប់កិច្ចសន្យារបស់រដ្ឋាភិបាលសហរដ្ឋអាមេរិកជាមួយនឹងអ៊ីនធឺណិតផ្កាយរណប StarLink របស់លោក Musk ឬក្រុមហ៊ុនបាញ់បង្ហោះយានចម្លង SpaceX នោះទេ។លោក Musk និងលោក Trump បានចាប់ផ្តើមសង្គ្រាមពាក្យសម្ដីដ៏ក្ដៅគគុកនៅសប្តាហ៍នេះ ខណៈលោក Musk បានរិះគន់សេចក្ដីព្រាងច្បាប់មូលនិធិរដ្ឋាភិបាលរបស់លោក Trump ថាជាការស្អប់ខ្ពើម ។ ការប្រឆាំងរបស់លោក Musk ចំពោះវិធានការនេះ បានធ្វើឱ្យស្មុគស្មាញដល់កិច្ចខិតខំប្រឹងប្រែងដើម្បីអនុម័តច្បាប់នៅក្នុងសភា ជាទីដែលគណបក្សសាធារណរដ្ឋមានសំឡេងភាគច្រើនតិចតួចនៅក្នុងសភា និងព្រឹទ្ធសភា៕