អភិបាលរដ្ឋ California មកពីបក្សប្រជាធិបតេយ្យ របស់សហរដ្ឋអាមេរិក បានរិះគន់ខ្លាំងៗលើការដាក់ពង្រាយទាហានឆ្មាំជាតិ នៅទីក្រុង Los Angeles កាលពីថ្ងៃអាទិត្យ (០៨ មិថុនា) ដើម្បីបង្ក្រាបបាតុកម្ម ជុំវិញការអនុវត្តច្បាប់អន្តោប្រវេសន៍របស់លោកប្រធានាធិបតី Donald Trump ដោយហៅសកម្មភាពបញ្ជូនទ័ពនេះថាជារឿងខុសច្បាប់។

ឆ្មាំជាតិបានចាប់ផ្តើមដាក់ពង្រាយ ខណៈបាតុកម្មជុំវិញការឆ្មក់ចាប់ខ្លួនអន្តោប្រវេសន៍សហព័ន្ធ បានបន្តយៈពេលបីថ្ងៃនៅទីក្រុង Los Angeles ដោយឈានដល់ការប្រឈមមុខរវាងបាតុករ និងនគរបាល។ មន្រ្តីនគរបាលក្រុង បានប្រកាសដាក់បាតុកម្មមួយនៅជិតសាលាក្រុងថាជា "ការប្រមូលផ្ដុំដោយខុសច្បាប់" ដោយចោទថា ក្រុមបាតុករមួយចំនួនបានគប់ដុំថ្ម ដប និងវត្ថុផ្សេងៗទៀតដាក់លើនគរបាល។

អភិបាលរដ្ឋ Californi លោក Gavin Newsom បាននិយាយថា លោកស្នើឱ្យរដ្ឋបាលលោក Trump ដកបញ្ជារបស់ខ្លួន ក្នុងការដាក់ពង្រាយកងទ័ពឆ្មាំជាតិចំនួន ២.០០០នាក់ នៅតំបន់ Los Angeles ដោយហៅសកម្មភាពនេះថាជារឿងខុសច្បាប់។ ក្នុងការបង្ហោះលើបណ្ដាញសង្គម X លោក Newsom បានចោទលោក Trump ថាព្យាយាមបង្កើតវិបត្តិ និងរំលោភលើអធិបតេយ្យភាពរដ្ឋរបស់ California ហើយរិះគន់ថា "ទាំងនេះគឺជាទង្វើរបស់ជនផ្តាច់ការមិនមែនប្រធានាធិបតីទេ"។

សេតវិមានជំទាស់នឹងការលើកឡើងរបស់លោក Newsom ដោយនិយាយក្នុងសេចក្តីថ្លែងការណ៍មួយថា "អ្នកគ្រប់គ្នាបានមើលឃើញភាពចលាចល ហិង្សា និងភាពគ្មានច្បាប់យ៉ាងច្បាស់ក្នុងបាតុកម្មនោះ"។ លោក Trump នៅក្នុងសារបង្ហោះបណ្ដាញសង្គមកាលថ្ងៃអាទិត្យ បានហៅក្រុមបាតុករថា "ក្រុមបះបោរដោយហិង្សា" ហើយព្រមានថា លោកកំពុងបញ្ជាឱ្យគណរដ្ឋមន្រ្តីរបស់លោក "ចាត់វិធានការចាំបាច់ទាំងអស់" ដើម្បីបញ្ឈប់នូវអ្វីដែលលោកហៅថា "កុបកម្ម"៕