ប្រធានាធិបតីថ្មីរបស់កូរ៉េខាងត្បូង លោក Lee Jae-myung នៅថ្ងៃចន្ទដើមសប្ដាហ៍នេះ បានណែនាំរដ្ឋាភិបាលឱ្យបង្កើតវិធានការទប់ស្កាត់អតិផរណា ដើម្បីសម្រាលបន្ទុកសេដ្ឋកិច្ចលើប្រជាជន។

លោក Lee បានធ្វើសេចក្ដីអត្ថាធិប្បាយបែបនេះ ក្នុងអំឡុងពេលកិច្ចប្រជុំលើកទី ២ នៃក្រុមការងារសេដ្ឋកិច្ចបន្ទាន់ជាមួយក្រុមជំនួយការប្រធានាធិបតី និងមន្ត្រីរដ្ឋាភិបាល ដែលត្រូវបានរៀបចំឡើងដើម្បីពិភាក្សាអំពីថវិកាបន្ថែមក្នុងគោលបំណងជំរុញតម្រូវការក្នុងស្រុកដែលធ្លាក់ចុះ។

លោកត្រូវបានគេដកស្រង់សម្ដីដោយនិយាយថា ដោយសារបញ្ហាអតិផរណាកំពុងតែបង្កការឈឺចាប់ខ្លាំងដល់ប្រជាជន លោកចង់ឲ្យអ្នករាល់គ្នាវាយតម្លៃស្ថានភាពបច្ចុប្បន្ន និងរៀបចំវិធានការដែលអាចធ្វើទៅបាន។

លោក Lee ក៏បានលើកឡើងពីកង្វល់ជុំវិញការឡើងថ្លៃទំនិញនានាក្នុងពេលថ្មីៗនេះលើតម្រូវការមុខទំនិញប្រចាំថ្ងៃ ដូចជាមីកញ្ចប់ ជាដើម ដោយជំរុញឱ្យក្រសួងពាក់ព័ន្ធរៀបចំវិធានការត្រួតពិនិត្យអតិផរណា។

នៅមុនកិច្ចប្រជុំ ប្រធានាធិបតីទើបជាប់ឆ្នោតរូបនេះ ក៏បានបញ្ជាក់ជាថ្មីទៀតផងដែរពីការប្ដេជ្ញាចិត្តរបស់លោក ក្នុងការបន្ថែមកញ្ចប់ថវិការដើម្បីជួយជ្រោងសេដ្ឋកិច្ចរបស់ប្រទេសនេះក្រោយចាប់ផ្ដើមងើបចេញពីភាពវឹកវរខាងនយោបាយចាប់តាំងពីចុងឆ្នាំ២០២៤មក ៕