មន្រ្តីជំនួយការរបស់វិមានក្រឹមឡាំង លោក Nikolai Patrushev បាននិយាយក្នុងបទសម្ភាសន៍មួយ ចេញផ្សាយនៅថ្ងៃចន្ទ (០៩ មិថុនា) នេះថា ប្រធានាធិបតីរុស្ស៊ី លោក Vladimir Putin បានអនុម័តយុទ្ធសាស្ត្រកងទ័ពជើងទឹកថ្មីមួយ ដែលមានបំណងស្តារឡើងវិញនូវជំហររបស់រុស្ស៊ី ក្នុងនាមជាមហាអំណាចដែនសមុទ្រមួយរបស់ពិភពលោក។

រុស្ស៊ី មានកងទ័ពជើងទឹកដ៏មានឥទ្ធិពលបំផុតទី៣ របស់ពិភពលោក បន្ទាប់ពីចិន និងសហរដ្ឋអាមេរិក នេះបើយោងតាមចំណាត់ថ្នាក់សាធារណៈភាគច្រើន ទោះបីជាកងទ័ពជើងទឹកទីក្រុងមូស្គូ បានទទួលរងការខាតបង់ជាបន្តបន្ទាប់ក្នុងសង្គ្រាមអ៊ុយក្រែនក៏ដោយ។

លោក Patrushev អតីតមន្ត្រីចារកម្ម KGB ដែលបម្រើការជាមួយលោក Putin នៅទីក្រុង St. Petersburg ភាគខាងជើងរុស្ស៊ី ក្នុងសម័យសូវៀត បាននិយាយថា យុទ្ធសាស្ត្រកងទ័ពជើងទឹកថ្មីនេះ -មានចំណងជើងថា "យុទ្ធសាស្រ្តសម្រាប់ការអភិវឌ្ឍនៃកងទ័ពជើងទឹករុស្ស៊ីរហូតដល់ឆ្នាំ២០៥០" - ត្រូវបានអនុម័តដោយលោក Putin កាលពីចុងខែឧសភា។

លោក Patrushev មិនផ្តល់ព័ត៌មានលម្អិតបន្ថែមពីយុទ្ធសាស្ត្រនេះទេ ប៉ុន្តែរុស្ស៊ី បានបង្កើនការចំណាយលើវិស័យការពារជាតិ និងសន្តិសុខដល់កម្រិតសង្គ្រាមត្រជាក់ ក្នុងតួលេខប្រហែលជាច្រើនភាគរយនៃផលិតផលក្នុងស្រុកសរុប។ ទិន្នន័យប្រភពបើកចំហរបង្ហាញថា រុស្ស៊ីមាននាវាមុជទឹកចំនួន ៧៩គ្រឿង រួមទាំងនាវាមុជទឹកដើរដោយថាមពលនុយក្លេអ៊ែរចំនួន ១៤គ្រឿង ព្រមទាំងនាវាចម្បាំង ២២២គ្រឿងផងដែរ៕