នាង Sheetal Kumari និងគ្រួសាររបស់នាង ធ្លាប់ស៊ាំក្នុងការរស់នៅដោយមិនមានម៉ាស៊ីនត្រជាក់រហូតដល់ផ្ទះរបស់ពួកគេមិនអាចទ្រាំទ្របាន កំឡុងខែរដូវក្តៅ នៅពេលដែលសីតុណ្ហភាពអតិបរមាជាមធ្យមឡើងខ្ពស់ដល់ជិត ៤០អង្សាសេ។

និស្សិតអាយុ ២១ឆ្នាំរូបនេះ រស់នៅក្នុងតំបន់មានសំណង់មិនរៀបរយក្នុងតំបន់ជាយក្រុងរបស់ទីក្រុងញូវដេលី (New Delhi) ជាកន្លែងដែលផ្ទះជាច្រើនត្រូវបានសាងសង់យ៉ាងប្រញាប់ប្រញាល់ ក្នុងទីធ្លាតូចចង្អៀតគ្មានខ្យល់អាកាសចេញចូលគ្រប់គ្រាន់។

សម្រាប់ពួកគេ កម្ដៅរដូវក្តៅ គឺមិនសូវជាល្អប្រសើរនោះឡើយ ពោលគឺវាជាការគំរាមកំហែងដល់សុខភាព។ នាង Sheetal បានប្រាប់សារព័ត៌មាន CNA ថា៖ «ប្អូនស្រីរបស់ខ្ញុំត្រូវសម្រាកនៅមន្ទីរពេទ្យ ដោយសារកម្ដៅក្ដៅខ្លាំងដ៏គ្រោះថ្នាក់។ បន្ទាប់ពីមានរឿងនោះ ពួកយើងសម្រេចចិត្តដាក់ម៉ាស៊ីនត្រជាក់»។

ឥឡូវនេះ គ្រួសារនេះជួលម៉ាស៊ីនត្រជាក់ ២គ្រឿងក្នុងតម្លៃប្រហែល ៣៥០ដុល្លារ សម្រាប់រយៈពេល ៣ខែនៅរដូវក្តៅ។ នាង Sheetal បាននិយាយថា ការធ្វើបែបនេះជួយសន្សំប្រាក់ពួកគេ ដោយសារការទិញ នឹងនាំឲ្យចំណាយទ្វេដង ដោយមានទាំងការចំណាយលើការសម្អាត និងការថែទាំបន្ថែមទៀត។

ឥណ្ឌាកំពុងត្រៀមប្រឈមនឹងរលកកម្ដៅច្រើនថ្ងៃជាងមុនទ្វេដង នាឆ្នាំនេះ ទោះបីជាមានព្យុះផ្គររន្ទះ នាពេលថ្មីៗនេះ នាំឲ្យមានភាពធូរស្រាលខ្លះៗក៏ដោយ។ ការកើនឡើងនេះបានជំរុញឲ្យប្រទេសមានប្រជាជនច្រើនជាងគេលើពិភពលោក ក្លាយជាទីផ្សារដែលមានតម្រូវការម៉ាស៊ីនត្រជាក់លឿនបំផុតរបស់ពិភពលោក។ ទីភ្នាក់ងារថាមពលអន្តរជាតិ បានព្យាករថា ឥណ្ឌានឹងមានម៉ាស៊ីនត្រជាក់ច្រើនជាង ១ពាន់លានគ្រឿងដែលកំពុងដំណើរការនៅឆ្នាំ២០៥០៕