ស្វាយរៀង ៖ មន្ត្រីជំនាញក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យវាយតម្លៃលទ្ធ ផលបញ្ចប់គម្រោងថែទាំខួបផ្លូវក្រាលខ្សាច់ភ្នំ និងល្បាយថ្ម ចំនួន២ខ្សែ នៅក្នុងខេត្តស្វាយរៀង ។

​តំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដឹកនាំដោយ ឯកឧត្តមបណ្ឌិត នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ ឯកឧត្តម ឈន សេដ្ឋា តំណាងក្រសួងសេដ្ឋកិច្ច និង ហិរញ្ញវត្ថុ និងមានការអញ្ជើញចូលរួមពីមន្ត្រីថ្នាក់ដឹកនាំមន្ទីរអភិវឌ្ឍន៍ជនបទខេត្តស្វាយរៀង កាលចុង សប្ដាហ៍មុននេះ បានចុះត្រួតពិនិត្យ និងវាយតម្លៃលទ្ធផលការងារបញ្ចប់សុពលភាព គម្រោងថែទាំខួបផ្លូវ ក្រាលខ្សាច់ភ្នំ ចំនួន២ខ្សែ ដែលមានប្រវែងជាង១៦,៥គីឡូម៉ែត្រ។ ក្នុងនោះខ្សែផ្លូវទី១ ក្រាលខ្សាច់ភ្នំ ប្រវែង១២គីឡូម៉ែត្រ ទទឹង៥ម៉ែត្រ ឆ្លងកាត់ឃុំស្វាយជ្រំ និងឃុំស្វាយយា ស្រុកស្វាយជ្រំ និងខ្សែផ្លូវទី២ ក្រាលល្បាយក្រួស ប្រវែង៤ពាន់ ៦០០ម៉ែត្រ ទទឹង ៦ម៉ែត្រ ស្ថិតនៅឃុំម្រាម និងឃុំសម្បត្តិមានជ័យ ស្រុករមាសហែក ខេត្តស្វាយរៀង ។ 

ក្នុងពេលដឹកនាំក្រុមការងារចុះពិនិត្យផ្លូវទាំង២ខ្សែ ឯកឧត្តមបណ្ឌិត នួន ដាញ៉ិល បានណែនាំ ដល់មន្ត្រីថ្នាក់ដឹកនាំមន្ទីរអភិវឌ្ឍន៍ជនបទខេត្ត ត្រូវចាត់តាំងក្រុមការងារមន្ទីរ ចុះសហការជាមួយរដ្ឋបាល តំបន់ ពិសេសពលរដ្ឋ ដែលរស់នៅអមសងខាងផ្លូវ ធ្វើការជួសជុល កែលំអ ក្នុងករណីផ្លូវត្រូវទឹកហូរច្រោះ ឬខូចខាតដោយប្រការណាមួយ ដើម្បីប្រើប្រាស់បានយូរអង្វែង ៕

អត្ថបទ៖ ភា សារិទ្ធ