អ្នកនាំពាក្យអង្គការថាមពលបរិមាណូអ៊ីរ៉ង់ លោក Behrouz Kamalvandi បាននិយាយថា អ៊ីរ៉ង់អាចនឹងពិចារណាឡើងវិញនូវទំនាក់ទំនងរបស់ខ្លួន ជាមួយទីភ្នាក់ងារថាមពលបរិមាណូអន្តរជាតិ (IAEA) ប្រសិនបើក្រុមប្រឹក្សាភិបាលរបស់អង្គការនេះ អនុម័តសេចក្តីសម្រេចអវិជ្ជមានទាក់ទងនឹងកម្មវិធីនុយក្លេអ៊ែររបស់ប្រទេសនេះ។

ដោយអត្ថាធិប្បាយអំពីសក្តានុពលនៃការអនុម័តសេចក្តីសម្រេចប្រឆាំងអ៊ីរ៉ង់ នៅឯកិច្ចប្រជុំក្រុមប្រឹក្សាភិបាលរបស់ IAEA នាពេលខាងមុខ លោកបានថ្លេងថា៖«យើងបានព្រមានពួកគេកាលពីលើកមុន ប៉ុន្តែពួកគេមិនស្តាប់យើងទេ ហើយយើងបានបង្កើនការផលិតអ៊ុយរ៉ាញ៉ូមដែលចម្រាញ់ដល់ ៦០% ចំនួន ៧ ដង។ ឥឡូវនេះ យើងក៏មានបញ្ជីនៃជំហានសងសឹក និងបានជូនដំណឹងដល់ពួកគេរួចហើយ។ ជាក់ស្តែង ទីភ្នាក់ងារនេះ មិនគួររំពឹងថា អ៊ីរ៉ង់នឹងបន្តកិច្ចសហប្រតិបត្តិការស្ថាបនាដូចពីមុនទេ» ។

នៅថ្ងៃទី ៣១ ខែឧសភា សារព័ត៌មាន AFP បានដកស្រង់ទិន្នន័យពីរបាយការណ៍សម្ងាត់របស់ IAEA ដែលបង្ហាញថា ប្រទេសអ៊ីរ៉ង់ បានបង្កើនការផលិតអ៊ុយរ៉ានីញ៉ូម ដែលសម្បូរទៅដោយសារធាតុរ៉ែខ្ពស់របស់ខ្លួនក្នុងរយៈពេលប៉ុន្មានខែថ្មីៗនេះ។ ជាការឆ្លើយតប ក្រសួងការបរទេសអ៊ីរ៉ង់ បានអះអាងថា ឯកសារនេះ «មិនឆ្លុះបញ្ចាំងពីកម្រិតជាក់ស្តែងនៃកិច្ចសហប្រតិបត្តិការ» រវាងទីភ្នាក់ងារ និងសាធារណរដ្ឋនេះ ដោយចោទប្រកាន់ IAEA ថា ពឹងផ្អែកលើ «ឯកសារក្លែងក្លាយដែលផ្តល់ដោយអ៊ីស្រាអែល»។

អគ្គនាយក IAEA លោក Rafael Grossi បានការពាររបាយការណ៍នេះ ដោយបញ្ជាក់ថា ឯកសារនេះ គឺមិនលម្អៀង និងផ្អែកលើការរកឃើញជាក់ស្តែងពីក្រុមអធិការកិច្ច។