រដ្ឋនានា នាថ្ងៃចន្ទ (ទី៩ ខែមិថុន) បានថ្កោលទោសការស្ទាក់ចាប់របស់អ៊ីស្រាអែល ចំពោះនាវាផ្តល់ជំនួយដែលកំពុងឆ្ពោះទៅកានតំបន់ហ្កាហ្សា ដោយមានសកម្មជនអន្តរជាតិជិះនៅលើនោះ។

នាវាទេសចរណ៍ដែលមានទង់ជាតិអង់គ្លេសឈ្មោះ Madleen ប្រតិបត្តិការដោយអង្គការ Freedom Flotilla Coalition ដែលគាំទ្រប៉ាឡេស្ទីន មានបំណងផ្តល់ជំនួយជានិមិត្តរូបដល់តំបន់ហ្កាហ្សា នៅយប់ថ្ងៃចន្ទនេះ និងលើកកម្ពស់ការយល់ដឹងជាអន្តរជាតិ អំពីវិបត្តិមនុស្សធម៌ នៅទីនោះ។

អ៊ីរ៉ង់បានពណ៌នាចំណាត់ការរបស់អ៊ីស្រាអែលថា ជាទង្វើចោរប្លន់។ អ្នកនាំពាក្យក្រសួងការបរទេស លោក Esmaeil Baqaei បានប្រាប់សន្និសីទសារព័ត៌មាននៅទីក្រុងតេអេរ៉ង់ថា៖ «ការប្រើកម្លាំងលើក្រុមមនុស្សធម៌នេះ ដោយសារវាបានកើតឡើងនៅក្នុងដែនទឹកអន្តរជាតិ ត្រូវបានចាត់ទុកថា ជាទម្រង់នៃទង្វើចោរប្លន់ នៅក្រោមច្បាប់អន្តរជាតិ»។

ចំណែកប្រទេសទួរគីបានថ្កោលទោសការរឹបអូសនាវាផ្ដល់ជំនួយរបស់អ៊ីស្រាអែលនេះ ដែលខ្លួនបាននិយាយថា កំពុងដឹកពលរដ្ឋទួរគី ក៏ដូចជាសកម្មជន នាង Greta Thunberg ក្នុងចំណោមនាវិក ១២រូប ដោយបានហៅទង្វើនេះថា ជាការរំលោភច្បាប់អន្តរជាតិយ៉ាងច្បាស់ក្រឡែត។

គួរបញ្ជាក់ថា នាវា Madleen បានចាកចេញពីប្រទេសអ៊ីតាលី កាលពីថ្ងៃទី១ ខែមិថុនា ដើម្បីលើកកម្ពស់ការយល់ដឹង អំពីកង្វះខាតស្បៀងអាហារ នៅតំបន់ហ្កាហ្សា ដែលអង្គការសហប្រជាជាតិ បានពិពណ៌នាថាជា «កន្លែងស្រេកឃ្លានបំផុត នៅលើផែនដី» ដោយប្រជាជនទាំងអស់ប្រឈមនឹងគ្រោះទុរ្ភិក្ស។

នៅក្នុងសេចក្តីថ្លែងការណ៍មួយ អង្គការ Freedom Flotilla Coalition បានឲ្យដឹងថា កងទ័ពអ៊ីស្រាអែល «បានស្ទាក់ចាប់» នាវានេះ នៅក្នុងដែនទឹកអន្តរជាតិ នៅវេលាម៉ោង ១:០២នាទី ម៉ោងសកល នៅពេលដែលវាកំពុងទៅកាន់តែកៀកតំបន់ហ្កាហ្សាស្ទ្រីប៕